中環在線：玉石估值大跌 冠軍要換鑑證師
近年金融界都有幾多奇聞，好似「沉香大王」簡文樂舊年底賣走冠軍科技（092），簡文樂之前買落一批玉石文物，公司早前披露因為重估呢批玉石而撇賬42億。莫講話有份畀錢嘅股東，連唔關事嘅人睇到都打曬問號。
冠軍噚日因股份20合1等議案舉行股東特別大
會，股東都乘機問個究竟。但現場所見，股東們未算太嬲，反而爭食西餅仲勞氣，有位豪氣股東仲話，「十幾萬輸唔起咩？」
股東輕輕鬆鬆食西餅，但保安就絕不放鬆。今次保安十分森嚴，前後有4名保安嚴陣以待，每次會議室開門閂門，保安都用紙遮住門口唔畀影相，但最終執行董事廖嘉濂（圖）都有出嚟解畫。
望套現撐股價
廖嘉濂解釋，今次玉石文物估值大跌，係因為公司換咗位鑑證師，仲話古董鑑證好主觀，引致估值有落差，為咗喺12月之前得出「無可置疑」嘅估值，公司會尋找更專業嘅國家級鑑證師，而之後就希望賣出玉石文物變現，拎番幾十億之餘，順便支持嚇股價。
至於到底係乜文物咁厲害，佢就話有九成都係晶石，例如壽山石、雞血石等，暫時放喺前主席簡文樂私人經營嘅博物館當中，話保安夠曬森嚴。睇嚟公司似乎真係好注重安全。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
