特朗普砌伊朗谷油價
2017年10月19日
十九大召開成為市場焦點，股市話題冇咁受關注，美股杜指雖然衝破左二萬三千點大關，但係恒指反應唔大。
共和黨繼續做油商老友
中共總書記習近平噚日現身，講足三個幾鐘，講到中國喺2020年進入新時代，要用30年成為現代化強國。有個政界高人話，無論下周三出嚟嘅新政治局常委
名單係點，都係滿足下大家嘅好奇心，但對大局冇大影響，o依家個局已經好清楚，習大大全面掌權，新一屆政府會更加強勢，下個月佢就會招呼美國總統特朗普到訪中國。以目前中美兩國嘅形勢，相信唔會擦出乜嘢火花。
有中環茶友話，特朗普上場整色整水，實際係行番舊路，就係益吓財團，特別係軍火商同油商，係咁嘅環境下，同中國關係唔會差得去邊。
呢個星期特朗普再度擺出強硬姿態，出招對付伊朗，拒絕確認伊朗遵守核協議。呢個做法令到中東局勢再度緊張，好多人就將焦點放喺核擴散嘅問題上，擔心美國一旦重新實施制裁，會令伊朗重新進行核計劃，認為特朗普嘅做法無助世界和平。
中環茶友就笑言，世界和平係咪特朗普嘅主要議題，要係佢肚入面條蟲至知，但睇佢人品唔似關心呢個問題。但無論點搞都好，特朗普想做嘅事係制裁伊朗，咁做就會對油價同油商有利，呢個就係共和黨嘅核心價值。
睇番特朗普上台，雖然佢做事同共和黨當權派格格不入，但好戰色彩就一致，咁樣自然對軍火商有利。同樣地，美國退出巴黎協議，以至依家針對伊朗，都係對油商有利。喺共和黨主政年代，油價曾經飆升高見147美元。
但係自從奧巴馬上台後，容許開採頁岩油，又大力支持新能源，加埋同伊朗達成協議，容許佢輸出石油，就令油價輾轉向下。到特朗普上場，雖然油價供求冇好大改變，但油價近期開始陰陰向上，如果未來中東局勢緊張，以至對伊朗重新實施禁運，都會利好油價表現。
長遠嚟睇，依家歐洲率先定出限制淘汰燃油車嘅時間表，計劃若然實施，對石油需求會有明顯衝擊，不利維持油價，所以長遠油價前景有人睇得幾淡。但短期而言，特朗普嘅中東政策愈嚟愈出，對油價就變成利好因素，所以呢排石油股走勢都稍為轉強左，我睇油價同油股仲有得去吓。
平保新高 眾安繼續回吐
十九大召開，焦點先喺政治，經濟政策未有咁快成為焦點。暫時大家對內地前景信心唔差，個市就炒住內險股先，幾隻大股都表現唔錯，平保(2318) 單日急升近2%，報收66.15元，創出新高；一向開慢車嘅國壽(2628) 仲升左2.3%，收報24.8元，唯獨隻網上保險股眾安在線(6060) 就繼續回吐，急挫4.5%，收報82.05元，呢隻嘢炒味好濃。
內地對樓市無乜負評，內房股普遍做好，融創中國(1918) 又玩挾挾，急升7%，收報39.5元；中國恒大(3333) 升1.3%，收報30.3元。大市就跟住外圍上升，恒指收報28711，升14點；國企指數收報11621，漲53點，成交金額876億元。內地A股都係差唔多，上證指數收報3381點，升9點，深證成指收報11282點，升7點。
陸羽仁
金融High Tea 舊文
來源 source: http://hdfin.stheadline.com
