操盤手劄記：大市牛皮講股仔
■一帶一路係央企必爭之地，港企可作踏板，亞洲聯合基建係「帶路」先鋒。 互聯網圖片
十九大開鑼，股市當然要穩，滬指波幅只得11點，港股波幅不足100點。習近平會上提出六大經濟方針：深化供給側改革、建設創新型國家、實施鄉村振興戰略、實施區域發展戰略、完善
社會主義市場經濟體制、推動形成全面開放新格局。相關股份有炒味！
講到區域發展，習核心有三大project：一帶一路、京津冀雄安區、粵港澳大灣區，當中以一帶一路最大。老牌港資建築商俊和（711，已改名「亞洲聯合基建」）早就部署食呢餐大茶飯，舊年11月已喺新加坡收購顧問公司了解南洋市場，今年7月更喺菲律賓投得輸水隧道工程，又同隸屬央企嘅葛洲壩結盟，係少有嘅一帶一路港資受惠股。
公司創辦人彭氏家族，其實舊年尾先重掌公司。話說2014年彭家將公司賣盤，中資新維成大股東；2016年3月改名「中國城建」，但4月爆出第二大股東中國城建控股財困兼央企變民企，公司隨即劃清界線，8月再改名「亞洲聯合基建」；10月新維提出罷免三名董事，11月又提出供股，市場揣測新維藉供股攤薄中城建持股；12月彭家以每股1.08元買起新維持股，收拾殘局。
該股近日忽然異動，毫子股變蚊股，上周五更大成交搶高19%，雖然呢兩日有回吐，但本月11個交易日累升47%，似乎將有好事。一帶一路係央企必爭之地，央企要走出去，必借港企作踏板，亞洲聯合基建係「帶路」先鋒，現價1.25元，市值只係20億元，市盈率9倍，市賬率0.9倍，再成央企併購對象唔奇！彭家曾賣盤，再賣亦唔奇！
該股NAV為22.2億元，負債部份有兩筆可換股債券，分別喺兩個月及半年後到期，共值2.63億元，若順利換股，每股NAV將由1.371元提升至1.5元樓上；計埋轉售屯門菁雋同馬鞍山耀沙路地皮，更唔止呢個數。該股現價相對每股NAV仍有距離，仲未計殼價，不妨留意嚇。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com
