中環在線：四叔推個人網頁教錢滾錢
■聽聞首頁呢張相，四叔有親自畀意見！互聯網
88歲嘅恒地（012）主席「四叔」李兆基真夠潮，噚日推出個人網頁。查實佢出過自傳，今次再推個人網頁，十足十係電子版自傳，佢同大家開心share好多同屋企人影嘅合照、金句、演講片段等等。
話明係個人網頁，
入面當然有四叔嘅威水史，仲有大量「四叔金句」，仲記得四叔以前不時分享炒股心得與處世之道，近年佢少咗公開講，惟有喺佢網頁重溫一下。
話1萬可變4.68億
好似「男人最怕入錯行，女人最怕嫁錯郎」，佢認為入錯行好難翻身，如果順住個勢，好似近年投身金融業就可以變成富翁。此外，又有「搵錢要成功、使錢要成功」，呼籲大家賺錢之餘，不忘要多做慈善。最盞鬼莫過於佢叫後生仔要學識刻苦耐勞，如果經濟收入唔夠穩定就不宜早婚。
四叔又教大家要識得錢滾錢，仲舉咗個例子解釋，假如由20歲起，有1萬蚊本金做生意，每月有2%利潤嘅話，息疊息下，50年後就會變成4.68億喇，不過，最緊要係有本先。
網頁亦輯錄咗唔少四叔嘅演講，大家有興趣不妨收睇。聽聞四叔都好重視呢個網頁，從首頁嘅相片挑選同埋色調，四叔都有畀意見，話最緊要夠簡單同清楚。成個網頁由構思到設計再到資料搜集，足足籌備咗成年，真係落足工夫㗎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
