智取大市：股價爆發三引擎
■王傳福表示，比亞迪正同好多公司就電池業務合作洽商。 資料圖片
比亞迪（1211）唔覺唔覺一個月唔夠，股價由50蚊邊，衝到去接近80蚊，亦認真唔小嘢。
比亞迪近期業績麻麻，預料1至9月淨利潤跌兩成左右，三大業務分別為汽車業務、電池業務同手機部件及組裝業務。最
近無論國策以至行業形勢，均利好比亞迪到不得了，預料幾項業務都有本錢拗腰翻生。
話說中國有意將電動車全面普及時間表訂於2030年，比亞迪董事長王傳福更預計內地公共汽車喺2020年提早全面普及化。目前內地公共汽車市佔率以比亞迪最大，6月計為32%，假如電動公共汽車普及化殺到埋身，比亞迪市佔率有機會大幅度提升，將會成為換車潮大贏家。目前內地新能源公共汽車銷量增幅係以倍數計，比亞迪仍然喺低基數之下增長，快將進入高增長期。
另一賣點係電池業務，王傳福上月提到，正同好多公司就電池業務合作洽商，有機會喺年底前宣佈第一份車輛電池供應合同。電動車換車潮快將展開，比亞迪會有爆發性增長。至於手機部件及組裝業務，近年有埋Samsung訂單。幾個業務一片光明，德銀最近預計未來兩年淨利潤年複合增長率37%，增長更會持續幾年，難怪股價飛升。
晉佳
fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
