十九大後 股市唞唞經濟照谷
2017年10月18日
港股創左十年新高後，觀望氣氛都幾濃厚。市場o依家睇緊美國聯儲局主席人選，同時觀望吓「十九大」會議有乜特別。
香港投資者見慣股市起落，唔會因為大市登上高位而過度興奮，如果睇番區內股市，日、韓連日向好，可見全球牛氣好盛，不獨香港為然。
過去五屆A股都要唞唞
港股投資者內外觀望，美國聯儲局主席可能換人，熱門人選傳嚟傳出，各人有不同風格，焦點係鷹派定係鴿派。有中環茶友笑言，做左鬼就會迷人，候選人未做官前嘅說法只係參考，做左官就屁股指揮腦袋。
美國總統特朗普唔想股市衰，照計唔會搵個鷹派倒自己米，但要留意嘅係，如果個市升得高，就可能借聯儲局可能換人消息調整吓，升跌只係按大戶需要解讀。
至於十九大影響就會顯著啲，喺會議前夕，內地股市無乜大上落。外資普遍認為，十九大後中國將進入新政治經濟周期，喺國家主席習近平強勢領導下，政府影響力會更大。
睇番過去五次大會，由會議開幕首日計起一個月本港同內地股市表現，港股表現有升有跌，A股就喺五屆會議閉幕後全部回落，原因估計係之前市況傾向維穩，開完會就鬆一鬆。
滬深兩市噚日雙雙低開，成交減少。上證指數收報3372點，跌左6點收市。深證成指收報11275點，升4點。
另外，12月到期嘅五年期國債期貨收盤跌0.25%至96.795，跌幅係五月以來最大；至今係連續第八天下挫，係五月以來最長連跌紀錄。
外資大行估計十九大大局已定，北京會加強推進經濟改革。野村估計，會議有望為未來五年訂出長期目標同任務，透過結構性改革、收入再分配，以及金融穩定，達致經濟再平衡。
花旗預計，新領導層會重申毋須盲目追求經濟高增長，因應粵港澳大灣區發展會有利好港澳嘅政策，基建、地產同服務業股份會受惠，軍工、化學、鐵路、油氣和工用股有望受惠國企改革。
基金公司富達就預期，中央會繼續調控樓市，由於大陸2020年城鎮化比率只有六成，投資者無需過份憂慮。
光棍節前偷步炒內需股
指數高位徘徊，投資者少做少錯等消息，港股高開後愈升愈少，恒指收報28697，叫做升左4點；國企指數收報11568，跌34點，成交只有839億元。
長實集團(1003) 傳以402億元出售中環中心75%業權，股價再升0.85元，收報67.35元，出售中環中心呢個消息傳左好耐，關鍵係業主皇帝女唔憂嫁，要等佢真係動筆簽左至當真。長實集團股價今年曾破70元大關，依家趁住消息就當落後炒番上啲。
臨近11月，市場選擇性炒吓大陸內需股，國美系孖寶起動，國美金融科技(628) 午後竄上，最高報1.2元，最後大升14.6%，收報1.1元。國美零售(493) 都升8%，報0.99元。
國美零售中期業績持平，管理層透露，集團線上線下交易總額按年增長31%，其中線上電子商務GMV增長110%。
線上電子商務自營部份銷售收入增長58.75%，線下嘅可比門店銷售收入減少約9.4%，臨近光棍節，可能搶閘炒炒呢啲零售股。
至於國美金融科技，公司早前透露，喺利用國美集團嘅多元化分銷管道同其他潛在網絡之前，集團擬收購一間已獲得第三方支付經營牌照嘅中國公司，或者有人炒吓呢排興嘅金融科技概念。
陸羽仁
金融High Tea 舊文
來源 source: http://hdfin.stheadline.com
