中環在線：鄭志剛文化中心搞桑拿亭
■鄭志剛構思嘅沐熱乘涼將於下月展覽。
新世界發展（017）第三代接班人鄭志剛（Adrian）又有新搞作，今次唔係藝術或電競，而係成立一個叫做Culture For Tomorrow（CFT）嘅非牟利機構，為一班本地年輕設計師同建築師提供一個平台，
去實現天馬行空嘅構想與設計。新世界一向係賣樓嘅，Adrian呢個idea終於同家族生意有直接啲嘅關係！
供市民網上預約
CFT首個活動叫做「沐熱乘涼（Hot is Cool）」，將芬蘭流行嘅桑拿與香港郊區常見嘅涼亭來個crossover，以藝術角度，就好似桑拿與涼亭來個對話一樣。呢個桑拿仲唔係裝置藝術咁簡單，而係「堅．桑拿」，12月8日至13日喺尖沙嘴文化中心露天廣場展覽期間，市民可以網上預約，真係走入去焗個桑拿，暫時只知名額有限，先到先得，未有確實詳情。
個涼亭亦有嘢玩嘅，展覽期間，CFT會喺涼亭舉行閱讀音樂會、文化講座、紙鳥互動創作體驗等等。
據講，Adrian今次推出呢個計劃，係希望畀本地年輕設計師同建築師一個平台，將佢哋工作上無法實現嘅新奇獨特構想成真，並且透過舉辦不同活動帶入社區，畀公眾感受同交流。都啱嘅，地產商做生意，多數用盡每分地方，邊有咁多空間畀建築師發揮，Adrian做呢行實明喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
