智取大市：北水主場注意位
■平保今日若見底反彈，重返強勢，「紅底」將變簡單任務。資料圖片
A股拖累港股急回，噚日執筆時黑期情況冷靜多了。用廢話嚟總結都要講，港股強勢形態呢一刻未被破壞，但不容連續急跌。
重申一次，外資對沖基金11月底年結前，主動拋售誘因低，加上12月淡季，於是成個場
北水玩曬。而北水個性最狼死，可能狼到你估唔到。年初至今滬綜指出現一日大陰燭就會見底，只要繼續呢個模式，下一浸可以再癲啲。潛台詞係，A股、港股超過一日大陰燭就不妙了。
以噚日跌較多嘅領袖股平保（2318）計，唔夠兩日由高位回8%，調整幅度正常，但過往港股短期亢奮期間，領袖股較少高位跌幅明顯超過一成，否則打擊信心，之所以話現水平不宜再大跌。而經過股價急回之後，9日RSI喺63至88之間，形成擴散三角形形態，技術形態反映同一結論：高位波幅擴大、買平保嘅人癲曬，但再大跌一日就向下跌破RSI擴散三角形支持線，吉兆都變凶兆。
若一如預期劇本，今日見底反彈，重返強勢，波幅就進一步擴大，癲上加癲，就如前日所講，平保「紅底」變簡單任務。未來兩日要提高警覺性，唔好話乜嘢兩手準備冇前瞻性咁老土，而家大市癲曬，股票變得投機，就要用投機方式去解決。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
