友邦單天保至尊
2017年11月14日
科網股三重彩第二關昨日登場，以電競為概念的雷蛇(1337) 登場，首日掛牌收報4.58元，較發售價3.88元，上升0.7元或18%，高位5.49元，低位4.56元，成交8.94億股，涉及金額44.2億元。以收市價計未算手續費及佣金，一手1000股賺700元。焦點半新股閱文
(772) 失守100元，低見94元，收跌3.8%報96.55元。
雷蛇低位可低吸博翻炒
雷蛇行政總裁陳民亮於上市儀式後話，公司產品於今年「雙十一」在內地電商平台表現很好，無論在京東或天貓平台，均在相關類型產品中排名第一，增長強勁，未來冀更多關注亞洲市場。集團旗下電競手機Razer Phone，將在周五在美國及歐洲地區開賣，稍後有望在全球地區包括亞太及中國地區市場推出該產品。零售商及機構對該公司產品亦有大需求，尤其是Razer Phone，現時社交媒體都看到對產品的推出感到鼓舞。
三重彩第二關派彩少過頭關，有中環茶友預留咗資金認雷蛇，對於呢個結果，佢話實際兩者相差唔係咁遠，皆因雷蛇分配率高啲，以佢自己為例，攞到雷蛇嘅貨市值多咗差唔多八成，所以計埋首掛沽貨獲利都有閱文(772) 差唔多一半，坦白講，閱文派彩咁高都有啲喜出望外，雷蛇本身嘅來頭冇咁勁，有咁嘅賺頭都算係滿意嘞。
茶友見隻雷蛇首掛高開低收，若然高位沽貨賺成30%，佢本來都係諗住走短線、食快餐，所以昨日一於食胡。其實佢首掛收市升幅唔多，高位趕唔切沽，去到呢個位可能再跌啲，但睇佢唔似破底嘢，所以見佢回得低啲，譬如去到4.2元，預定止蝕可以分段低吸吓，博佢收乾貨後炒番轉。
網保未真正食到肥肉
大市周一表現算硬淨，雖然外圍憂慮美國稅改推進有阻滯無乜力，指數跌轉升，恒指低開62點，其後友邦、騰訊及瑞聲(2018) 等重磅股齊造好下，推動大市重上水面，升幅更一度擴大逾100點，最多升137點，報29258，再創近十年新高，恒指收報29182，升61點；國企指數收報11684，跌61點，成交金額1154億元。
股王騰訊將於明日公佈季績，周一股價收升0.6%報387.6元；瑞聲繼續強勢，曾見185元，再創新高，收升5.8%報179.2元；港交所(388) 升2.5%報收235.4元。將成恒指新貴的舜宇(2382) 及碧桂園(2007) 周一齊造好，舜宇一度高見149.9元再破頂，收升6%報149元；碧桂園亦升5.7%報收12.98元；至於獲納入恒生綜合大中型股指數的鴻騰(6088) 及眾安(6060) 亦向好，鴻騰急升14%收報5.48元；眾安升2.2%報收77.95元。
友邦昨日唔聲唔聲嚇你一驚，皆因大摩認為友邦將受惠於內地放寬外資持股限制，股價一度高見65.6元創新高，收市升6%，報65.3元，為表現最佳藍籌股，兼且單天保至尊，為恒指貢獻141點升幅。眾安(6060) 股價大升，好多人話未來網上投保會成潮流，友邦最強就係銷售團隊，從佢股價顯示，市場仲係相信最賺錢嘅保險產品，仲係要有人推銷先至掂。
中環茶友笑言，買保險人人態度唔同，有人會主動投保，但佢從來唔會咁做，佢有好多份保險，全部係至愛親朋叫佢買，佢半賣人情先至落疊，所以佢相信傳統保險公司仲有得做。至於你話好鹹嘅車保或旅遊保險，未來就係網購世界，但呢啲都唔係友邦食緊嘅肥豬肉。
陸羽仁
金融High Tea 舊文
來源 source: http://hdfin.stheadline.com
