保利協鑫有運行
2017年11月15日
港股創出10年新高後倒跌，好彩幅度唔大，維持慢牛形態。指數無乜上落下，個股就大力爆上，若然扑中就十分和味。
跟北水追莊園即中伏
昨日爆升股份最矚目係莊園牧場(1533) ，公司喺香港掛牌嘅H股午後大幅波動，一度飆3.27倍，由上日收市價11元，升到47元創上市新高
，收報21.45元，仍然升95%。佢飆升原因係深交所公告表示，因莊園牧場其在香港市場價格穩定期已結束，昨日起把莊園牧場納入港股通名單。喺憧憬北水炒作下，股價搶高，佢升銳退速，若然高位47元入咗，依家已無咗一半有多，都咪話唔腳軟。內地炒家作風狠辣，呢啲亦係炒北水概念要預咗嘅風險。
莊園牧場喺2015年上市，公司係甘肅和青海領先的乳製品公司，營運及銷售主要集中於當地，以垂直綜合的業務模式營運。佢掛牌以來股價波動唔大，未炒作前市盈率18倍，忽然借港股通消息炒作，高追中伏心理壓力認真唔細。從莊園呢一役，可以見到北水依家喺市場嘅活躍程度，本地股民投資普遍保守，若然想喺北水流港間搵吓食，比較穩陣嘅方法，都係留意內地有乜熱炒板塊，吼位上車，勝過見高追貨。好似早排陸羽仁提過業績轉勢嘅保利協鑫，呢排就跟住內地炒光伏股嘅勢頭持續向好。
內地追捧光伏股，主要係因為行內有消息，今年四季以來國內光伏市場維持產銷兩旺，多數企業都處在滿產滿銷狀態，原因包括產品經過近年價格下調後推動需求、趕在年底分散式補貼下調前的啟動項目，再加上海外市場需求，令內地光伏板塊受到資金追捧。
根據業內人的睇法，今年光伏業基本上旺足全年，今年上半年就已經超過去年同期，下半年旺勢維持至今。市況咁旺主要係內地依家分散式裝機量的大幅增長，由於中央到各地都在推動光伏應用，估計成個行業仲有成個行業都有幾年好景。
內地炒光伏股先知先覺
至於保利協鑫喺呢個漲潮中相信都會好受惠，據公司管理層接受內媒訪問，透露金剛線切片等技術革命帶來的大幅降低成本，矽片價格從去年每片6元以上降到今年的每片5元以下，大大降低了光伏發電系統的度電成本，同時大大擴展應用市場。公司早前大力改造生產線，年底前就能實現全部矽片產能的金剛線切割，相信未來產能和銷售可以持續向好。
香港無光伏生產業，投資者唔係咁多相關消息，但內地就行先一步，跟住行業好轉持續炒緊光伏股。睇番保利協鑫，今年股價由低位0.72元一路炒上，昨日收報1.54元，升咗3%，升咗超過一倍，依家佢市盈率12.5倍。其他細啲嘅新能源股都造好，興業太陽能(750) 升5.2%，報2.85元；協鑫新能源(451) 升6.7%，報0.64元；陽光能源(757) 急漲11%，報0.355元；卡姆丹克太陽能(712) 升8%，報0.335元；順風清潔能源(1165) 升7.6%，報0.495元。光伏行業低迷多時，今年先喺谷底回升，所以雖然已經走咗一段，但考慮到未來營景仍會持續一段時間，保利協鑫作為行業大哥之一會繼續有運行，應該仲可以吼位等略回吐時分段吸納，好過同人爭買貴嘢。
恒指昨日高開，曾升過百點再創新高，但午後乏力，恒指收報29152，跌30點；國企指數收報11601，跌82點，成交1082億元。騰訊(700) 開市繼續發威，但之後不敵回吐功力，最後只能微升0.1%，收報388元；同系閱文(772) 漲4.5%，收報100.9元；新股三寶另一隻雷蛇(1337) 掛牌第二日回彈2.4%，報收4.69元，其他藍籌中吉利汽車(175) 借住有收購消息上揚6.4%，收報28.2元。
陸羽仁
金融High Tea 舊文
來源 source: http://hdfin.stheadline.com
