Money Walker：美元後市先強後弱
■美元近兩個月意外地扭轉弱勢。
連串經濟數據強勁下，美元近兩個月意外地扭轉弱勢，由於美元長期走強理論上不利亞洲股市，市場相當關心強美元係咪已成匯市新趨勢。不過筆者暫時認為美元只係短線走強，中線仍會走弱。
先講基本因素，雖
然美國今年12月加息一次嘅預期早已反映喺美匯上，但參考利率期貨市場，明年加息三至四次嘅預期似乎尚未完全反映，故單睇明年加息前景呢項因素，美元仍有空間進一步上升。但要留意嘅係，稅改仍不明朗，兩黨稅改分歧如果繼續擾攘，或會限制美元升勢。
中長線而言，隨住美國加息周期進入中期階段，加上個別國家如英國同新西蘭已經正式啟動加息周期，又或考慮提早加息，意味美元相對其他貨幣嘅息差或息差預期未來將會收窄，不利美元匯價。非美貨幣中地位較重要嘅係歐元，歐央行明年9月之前又會再度檢討買債，所以歐元中線前景仍具變數，或會左右美元走勢。至於上月一度困擾歐元嘅加泰獨立西班牙事件，暫時似乎已經平息，暫可不理。
技術分析上，美匯指數日線圖出現頭肩底呢項見底型態，意味該指數後市將會走強。由於美匯指數於94.2左右有支持，但95附近又略有阻力，筆者唔排除美匯會喺呢個範圍窄幅徘徊一段時間，並同時觀望是否有重大催化劑刺激美匯突破95。另外，值得留意嘅係，反映美匯指數中期走勢嘅周線圖，呈喇叭型擴大型態，預示該指數中期走勢仍會向下，美匯指數今年初展開嘅跌勢可能仍未結束。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.finance.appledaily.com
