樓市炒到爆
2017年11月21日
新股熱潮過後，大市略見失焦，反而樓市近日再現狂態變成話題。有發展商推出上環新盤，二百幾呎嘅單位賣成千萬，惹起市場熱議。外界揣測政府會唔會再推辣招，有分析家話根據過往經驗，每逢地王出世同樓價破位向上，政府都會加辣，睇嚟政府出招為期不遠矣。
分析家有此一說，實際係咪咁呢？陸羽仁
嘅睇法係，今時唔同往日，皆因上屆政府以打壓樓市為房策主軸，實行兩條腿走路，一邊搵地起樓，一邊控制買樓需求，希望買到時間增加供應。
現屆政府依家嘅做法，都可以叫做兩條腿走路，一條腿係繼續搵樓，另一條腿就叫做置業主導，即係大家想買樓，政府就盡量搵多啲樓俾大家買，咁同需求控制就好唔同啦。
政府唔加辣益唔到地產股
新政府嘅兩條腿同上屆睇落有啲唔同，睇真仲分別好大添。好似搵地咁，上屆係盲搶地，乜地都諗住用嚟起樓，你同我打官司覆核，我唔理地價會唔會受影響都照推。
現屆政府覺得咁樣開硬功唔係幾好，於是改為行共識政治，即係大家傾掂先至搞，認為咁做先至真係做到嘢。喺呢兩條腿移形換影下，特區政府會唔會再出辣招，好似話加稅甚至限購，都可想而知啦。
政府行辣招機會低呢個估計，唔係靠過往經驗分析出嚟，而係動態觀察。早兩日財政司司長陳茂波就同記者講，話依家冇計劃減辣，唔好聽人講會減辣而入市；同樣政府都冇計劃加辣，所以唔使驚會加辣走去買樓。財政司司長話唔減辣，呢幾年都講到慣，但話唔加辣講到咁明就好少嘞，所以呢句至係新聞。
地王出世，政府又無意加辣，樓價喺呢兩日都郁得好緊要。有地產界坦言，上環樓盤二百幾呎賣一千萬俾人拎出嚟講，實情呢個好快會變成市價，因為新地喺北角個盤都拎出嚟玩招標，咁你估呎價又會平咩？喺山頂由九倉(004) 、南豐及會德豐(020) 合作嘅新盤，兩個分層單位由同一組買家購入，售價分別逾5.6億元同逾6億元，呎價達13.2萬元，再創亞洲分層新高，聽落仲驚人。
本來無論地皮嘅麵粉價，同新盤嘅麵包價都熱辣辣，地產股應該都會有炒味，但暫時睇都未見郁，點解呢？一個解釋係地產股唔當炒，未反映升勢變成落後。另一個可能，就係市場驚樓市咁搞法，熱度不斷升高，就算政府唔出手，大家都有啲驚遲早有日會頂唔順爆煲，所以對佢嘅恐慌指數不斷上升，因為風險增加嘅折讓大咗，所以地產股價就跟唔上樓價。
好似有新盤開售嘅會德豐，噚日股價逆市微跌0.01%，收報59.35元，新世界(017) 好啲，收報11.46元，微升0.5%，但仍然完全跟唔上樓市熱度。
銀娛突破創三年新高
港股呢排開單邊，唔止其他地產股冇熱度，其他股都唔夠照，只係得隻騰訊(700) 續旺。騰訊股價再創新高，以全日最高位收市，收報420元，升4.1%，成交近145億元，單隻股份已貢獻恒指144點升幅。佢最新市值見3.99萬億元，逼近四萬億元，騰訊股價只要升多1.2元，市價將可突破4億元。
大市雖然有騰訊支撐，惟下跌股份亦超過六成，拖低大市升幅，恒指收報29260，升61點，國企指數收報11538，跌70點，成交1082億元。其他藍籌只有濠賭股有啲睇頭，銀娛(027) 股價創逾三年高，收報58元，升4.1%，成為表現最佳藍籌股。
陸羽仁
金融High Tea 舊文
來源 source: http://hdfin.stheadline.com
