智取大市：等騰訊重返高位
■騰訊如冇突如其來負面因素，相信悲觀極都會再次試一試439.6元高位。 資料圖片
正如之前所講，近期港股跌市同2015年港股大時代跌市情況相若，但規模會遠低於當年。上星期五A股回穩、港股大幅反彈，而A股即市回吐之際，騰訊（700）、平保（2318）再冇大量
沽壓出現，似乎北水沽貨潮或完結，相信嚟緊年底前安全系數上升返。
領袖股彈得多，早排跌得多嘅股亦彈得多。騰訊似乎人人都想買，在於相反理論而言，的確幾驚，因為散戶個個叫買嘅，最終代表購買力幾乎耗盡，股價長遠可能物極必反。不過，港股短期內已進行適度調整，騰訊貴為市值近4萬億嘅股份，即使已見頂，但咁大隻股要進入派發期，必然有秩序，喺騰訊可見將來冇突如其來負面因素之下，相信悲觀極都會再次試一試個頂439.6元，而呢個目標亦相信唔使太耐就能夠完成。
騰訊439.6元呢個價格，代表緊之前最樂觀投資者願意付出嘅價錢，理論上騰訊重返呢個位，甚至略為破頂亦會引來趨勢型投資者高追，到時都會有唔少人願意再加注接貨，要再挑戰高位機會大。審慎而簡單嘅操作，上望一成左右係較保險嘅一段利潤空間，值得一博。嚟緊會再update騰訊分析。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
