操盤手劄記：無息收就勢係假
■匯控受惠加息，股價橫行多時，屬於靜極思動現象，值得期待。資料圖片
呢期最hit，非Bitcoin莫屬！Bitcoin價格喺11月29日突破10,000美元，12月17日突破20,000美元，今年以嚟升幅近20倍！Bitcoin狂升，惹嚟丹麥央行行長
Lars Rohde力斥係致命嘅賭博，但南非央行前官員Eugene Etsebeth則力撐有條件成為數碼黃金！
Cryptocurrency（加密貨幣）一副挑戰Fiat currency（法定貨幣）嘅架勢，央行界當然關注，投資界亦議論紛紛，David Webb就形容係龐氏騙局！客觀嚟睇，Fiat currency嘅面值有政府擔保，亦有利息；Cryptocurrency則靠嚴控供應嚟支撐面值，無擔保，亦無處理利率問題。Crypto係擺脫政府嘅交易媒介，呢個既係賣點亦係弱點。咩合理價、目標價，難以用基本因素同技術分析，齋講供求。一枚Bitcoin買到4手匯豐控股（005）有凸，我寧願買匯控，話曬有5厘息。升幅係差好多，但穩陣好多！
美國稅改行將落實，經濟增長料將加速，副產品係通脹。聯儲局開曬口，明年再加息3次。不過，美國加息唔係純粹經濟原因，喺政治上係打金融消耗戰！加息引導全球資金流向自己，其他國家為咗留住資金，被逼跟隨加息，玩唔起就會被玩死。美國上周加息後，中國隨即出手，明顯係擔心走資。
美國今個加息周期由2015年12月起步，累計加息5次，合共1.25厘。雖然香港銀行體系資金充裕，未有跟隨，但港元同美元掛鈎，息率偏低會引發套息活動，估計拖到明年中就要跟隨，否則港元會捱沽，流向美元同人民幣。
喺加息周期，要特別留意上市公司嘅現金流，宜揀淨現金公司或派高息公司，避開孭重債公司。各行各業中，有加息話事權嘅銀行業可以睇高一線，具美國業務嘅匯控更加秤先啲。匯控7月至今喺70元至80元區間上落接近半年，橫行走勢屬於靜極思動現象，橫行時間越長，後向動力越大，值得期待。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.finance.appledaily.com
