收市閒情 - 千頌C 2017年12月20日
收市閒情：鄭志剛都揀Hypebeast
■鄭志剛喺Hypebeast寫專欄，多人睇得來又入到屋，仲可以名正言順講離地嘢。資料圖片
話說，有日行經太古廣場，驚見Joyce賣緊件DHL雨褸，咩呀？本來呢件事已經驚嚇過見到關家姐，更驚嚇係，件嘢盛惠5,000幾銀。Fat唇嘅嘢我識條鐵咩？唔識咪上網搵！
唔Search由是可，一Search竟然發現有個富三代幫Hypebeast（8359）寫專欄，仲要係中英對照嘅藝術Fat唇潮牌文，咁啱呢位富三代就係講緊呢件黃色雨褸點解會矜貴咗。
即係咁，都唔賣關子，點解鄭志剛貴為新世界（017）新旗手，要寫專欄嘅，你開聲各大傳統傳媒爭住幫你大字標題開欄位，大大聲「恭迎鄭公子」；再唔係掟嚿錢去開FB Page，甚至四叔咁，自己開個個人網頁，想點玩到天花龍鳳都得，點解要去Hypebeast呢？
因為咁，我思考咗兩個原因：
首先，點解唔用FB？𠵱家要有影響力，唔使Networking，只要識得經營網上平台，素人一個都可以大紅大紫。不過，當一個富豪名人、高官闊太，掉轉想反攻網上世界？除非你甘心玩貼地，仲要貼到好似當年曾俊華咁玩FB到出神入化，否則你想用網搞形象工程？唔畀嬲嬲你都偷笑，唔信？你望嚇Package Lau個FB？今時今日FB已經難有Reach，畀錢買Like又肉酸，再唔係就俾人鬧，開來托嗎？
第二係，咁阿鄭志剛一向都係Sell藝術人，開欄緊係講返自己在行嘅藝術。你喺傳統大眾傳媒（當係《蘋果》咁計啦）講藝術，啲人又唔識嘢；你喺其他報章網上版出，又冇人睇。係嘅，就去盡啲，走國際路線。咁Hypebeast來講，一來佢係國際潮牌網頁，但同時又係香港出品，唔會俾人口實。多人睇得來又中後生仔Market入到屋，講離地嘢又可以名正言順。
講到尾，當然可以話鄭公子搵呢個平台講係明智之舉，但更重要反映，世界冇嘢係必然。當鄭公子會喺間創板公司寫欄，你又點知件5,000幾銀黃色雨褸會冇人買？所以只要吹到個賣點兼Timing好，就算聲稱係「新世代首置計劃」嘅新世界天生樓，按息其實仲高過銀行，到最後，分分鐘都係好多人搶。
千頌C
http://fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.finance.appledaily.com
