收市閒情：康宏DQ花生背後
■康宏主席陳志宏。資料圖片
正當大家準備為恒指爆上三萬二，熱烈地彈琴熱烈地炒之際，有一隻股，出現股東內鬨，嗰隻股，叫康宏（1019）。覺得好複雜？講到尾，咪就係家變……
「個仔以後跟我！」「你諗嚇好啦！」冇錯，自從曹醫生出事之後，康宏兩大股東陣營──佳兆
業（1638）郭曉群一方，以及台灣富邦，就好似一對離婚夫婦咁，當正爭撫養權咁爭康宏。郭曉群一方，作為大股東，10月時就提出召開股東特別大會，動議罷免包括曹貴子在內的原董事局成員，諗住安插自己親信入局，「以後個仔啲老師、工人全部我請返，我會做監護人，我俾兩個月時間你做過渡期啦。」
郭方首先將對家一軍，你以為佢手執37%股權，只要去到12月股東大會一到，就可以大大聲叫「食糊」？咁諗就太天真了，因為過咗兩個月後，阿囝個媽媽咁講：「我𠵱家質疑你照顧個囝嘅資格，因為佢有可能唔係你親生嘅，我拎咗你同佢DNA去驗，雖然未驗到，但我要先DQ你作為監護人嘅權利！」What the……！
你覺得個比喻好Ridiculous？但事實真係咁！股東大會上，屬台灣邦嘅主席陳志宏就理直氣壯咁話，因為已向高院呈交一份質疑郭曉群等合法股東身份的入稟狀，所以「以我個人判斷」，裁定郭曉群一方投票權無效。
即係點呢？有重大議題時，原來只要是但搵人申請張入稟狀，主席就可以大大聲話「有人質疑你資格，股東權利？Sor，我有主席DQ掣，我㩒！㩒咗啦，你過主啦。」喂！未審先判喎！係呀，主席DQ掣大曬㗎。謝賢都有講啦，「球證、旁證、足協、足總、足委，全部都係我嘅人，龍門任擺，我玩曬啦，吹咩？」
大家花生一定食得好開心啦，但唔好忘記，先例一開，以後啲莊就識玩啦。「我係股東，我要收息，我要投票，我要喺股東會食西餅。」「有人質疑你資格，我同咗法庭講㗎啦，所以我DQ You任何嘅權利！」仲想食餅？返去瞓啦。
好啦，大家再睇返個囝康宏，阿爸阿媽爭住要養，好似好多人錫喎?「錫佢條命！佢哋爭來爭去，咪又係貪我係隻殼。死屍有價啊。」
千頌C
http://fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.finance.appledaily.com
