揸內銀好過揸公用股
2018年01月17日
港股只唞氣一日，跟住再爆上，而且力度驚人，牛氣頑強，如此升勢若然睇淡沽空，就真係夾到無命。
息口向上利金融不利公用
恒指大升565點，但走勢參差，升幅最勁係金融指數，彈高左1031點，升左2.4%，最弱係公用股指數，只係郁左76點，
基本上無郁過。陸羽仁去年底係美國加息前，認為金融股係穩陣之選，無論國際金融股好似滙控(005) 抑或係內銀股，都可以買。若然無乜心水，可以有大食大，買工銀(1398) 。
雖然港股呢排升勢好得人驚，但睇真係唔係瓣瓣得。有兩類股份基本上跑輸大市，揸左都浪費子彈，一類係傳統股仔；另一類係公用股。傳統股仔暫時唔得，皆因北水唔入，好多散戶見到咁，不如炒大股的衍生工具好過。至於公用股，好明顯係因為利息向上，對佢地呢種收息股不利。睇番公用股指數表現，過去三個月雖然恒指大升，但三個月計，公用股指數倒跌左0.68%，雖然幅度唔多，但係指數同期分別大升9%同11%之下，就真係相當無癮。
公用指數成份股有5隻，呢啲股份喺早幾年金融海嘯後表現非常靚仔，帶挈唔少股民長揸就已經賺大錢，亦形成左一個偏見，認為呢啲股有買貴，無買錯。不過，自從去年開始，公用股開始乏力，出現人升佢唔升嘅狀況，甚至有微微退步。
公用股表現落後，道理一字咁淺，就係因為美息向上，影響左公用股嘅吸引力。公用股早幾年能夠做好，主要係利息低，令佢相對吸引，若然(口依)家買債、炒債息口上升，咁買公用股要求息口回報都高，咁即係話股價唔可以升，甚至要跌啦。本來呢個狀況係簡單道理。
不過，有不少中環茶友手頭仲係揸住公用股唔想放，佢地咁樣反應一來係因為賺過錢有感情，覺得反正有息收，咪繼續收息囉；二來係覺得其他股價已經貴左，買高追，咁不如繼續坐。不過，從大市(口依)家表現，相信公用股落後狀況仲會繼續。
如果貨比貨，公用股同內銀股息口都較高，甚至後者仲高啲，內銀股雖然增長都未必好勁，但佢地受惠股市程度會大啲。
內地部份券商就提出，2017年三季度，銀行、石油石化、交運、地產和煤炭等行業的資金配置幅度最偏低。從抗風險角度，銀行、公用事業係抗跌力較高的板塊，若然兩者防守性相若，咁升起上嚟，內銀股就有可能勝一籌，此所以最近都見到內銀股有起動跡象。
港交所威風八面
新一年中港股市雙翼齊飛，上午滬深兩市低開後盤中反覆，創指一路走高，上證指數收報3436點，升26點；深證成指收報11386點，升79點，萬科A(000002)盤中近升停牌再創歷史新高。香港掛牌的萬科(2202) 爆升9%，收報42.2元，再創歷史新高。
港股大市升得誇張，收報31904，急升565點，距歷史高位僅54點；國企指數收報12787，上升316點，成交金額1646億元。大股中，騰訊(700) 收升2.54%，收報444.2元；港交所(388) 威風八面，急升5.9%，收報288.4元；中資金融股紛紛造好，建行(939) 升3.7%，收報8.13元；中行(3988) 上揚3.41%，收報4.24元；工行升3.31%，收報6.87元；平保(2318) 升2.8%，收報90.65元；中國人壽(2628) 漲2%，收報25.5元；盈富基金(2800) 都漲1.6%，繼續跑贏公用股。
陸羽仁
金融High Tea 舊文
來源 source: http://hdfin.stheadline.com
