坐實石油股
2018年01月25日
港股大升一日後，斷估都會唞唞，但指數低得百零點，又見資金流入。昨日輪到石油板塊爆炒，國企指數升幅再跑贏恒指。
陸羽仁啱啱寫完，有專家朋友看好油價，估計油價上升循環無咁快玩完。油價早一晚郁咗啲，「三桶油」股價已經彈上，最勁中石油(857) 升逾5
%、中石化(386) 升近5%、中海油(883) 亦都升逾3%。油服股價格仲敏感，爆炸力仲勁。
油服股爆炸力強
中環茶友中，有人一早睇好石油股，結果去年跑輸大市，佢都有啲無癮，O依家終於出番口氣。茶友話，O依家油價稍升，油股即彈，似乎呢個板塊貨源漸漸集中。石油同其他商品價格，近年好受中國經濟影響，內地經濟景氣回升，斷估油價唔會咁快玩完。佢喺悶市揸住三桶油收息都維持派息，O依家佢會繼續坐住，唔會急急走貨。
恒指喺炒板塊下七連升，並創即市歷史新高33018，收市漲27點，造32958；國企指數收報13620，上升130點；成交金額1878億元。
港股大升，但唔係人人受惠，若然公司唔爭氣，股東唯有歎自己唔夠眼光，但若然因為有人玩嘢，咁就真係無奈兼翳氣。
典型事例係電視廣播(511) 的回購股份大計，事件足足擾攘左成年，結果喺基金股東阻力下無功而回，期間大市升左六成，電視廣播股價不升反跌，股東著數變蝕底，多少都係基金股東要氣唔要錢，其他小股東被逼陪佢玩認真無奈。昨日為該公司公佈回購股份要約一周年，電視廣播喺開市前停牌，並於晚上發公告，指由於通訊局需更多時間就該公司於2015年及2016年兩次股權變動申請進行評定，擱置回購建議。
公司復牌股價報26.8元，同建議回購價相差一大截。有中環茶友一早喺佢股東受回購刺激時食啲胡，證明有胡要食，唔食多都食少呢個智慧幾時都用得着。
電視廣播一拍兩散
電視廣播一年前提出用42億元的回購股份方案，每股作價為30.5元，後來大股東同管理層聞到味，知道有人出招，於是提價至35.075元，較原本市值高出一截。由於完成後大股東持股量會由兩成六，增加至超過四成，需要向證監會申請豁免。證監會雖然俾左個豁免，但條件相當刁鑽，管理層一於打官司，最終贏左，不過又到通訊局出招，要求澄清，喺重重關卡下方案一直未能落實，外界已經覺得計劃凍過水，股價慢慢回落。現在牌底揭開，與基金股東算係一拍兩散。基金股東心態係想要等同收購的超高價，甚至可能係有興趣爭做主要股東，所以出手阻撓，但對其他小股東來說，若然去年初提出方案，快快走人賣股收錢，應該好大機會趕到第三季個市未大升前入市，O依家已經賺緊第二轉錢，家陣焗賭捱價，咁樣維權認真唔盞。
回購計劃落空，電視廣播股價回歸基本，咁就要睇佢業績如何。O依家傳媒難做，電視廣播算係做得唔錯，傳統電視廣告追數之餘，仲搞左好多新平台去增加收入。不過，新平台收入始絡同傳統廣告收入價錢差好多，加上要投資燒錢，所以盤生意仲係要寄望近日零售市道好番，廣告市道稍為好轉，呢啲都係「揼石仔」生意，股價要翻身，就要睇大股東同管理層有無辦法引進新概念嘞。
其他股份亦有表現，證券商股午後發力，中信證券(6030) 大漲近12%，收報22.9元；光大證券(6178) 升5.9%收報10.82元；中國銀河(6881) 升5.6%收報6.95元；第一上海(227) 收升5.4%報1.17元。
相反，早前幾隻強勢藍籌股，周三出現回吐，騰訊(700) 收跌1.2%報469元；中國平安(2318) 挫2.5%收報94元；港交所(388) 則跌0.7%收報301.4元。
陸羽仁
金融High Tea 舊文
來源 source: http://hdfin.stheadline.com
