中環在線：郭Sir約粉絲摸杯底
happy hour兩粒鐘
■郭Sir除咗講股教健身，嚟緊仲會同粉絲摸酒杯底。資料圖片
都說今時今日搵食艱難，無論做邊行都要扭盡六壬爭取人「關注」。好似「大隻佬股評人」郭思治（郭Sir），佢主理嘅民眾財經台舊年8月開台，除咗講股，仲教人健身，嚟緊三月
，佢又舉辦一場「摸酒杯底傾偈」招呼粉絲，認真要有好多計先得。
民眾財經台開台大約半年，YouTube訂閱人數超過1.1萬。身為台柱嘅郭Sir就話，想跟支持者聯誼一下，所以將於3月10號辦個活動，同粉絲摸酒杯底傾偈仔。
自稱唔識飲酒
郭Sir強調，活動志在開心，講股市又得，講健身又得，當係同支持者「食下美點，飲下紅酒，純粹嗰兩個鐘頭係relax㗎箒」。
呢個活動會喺百利達酒莊嘅一個showroom舉行，郭Sir指，酒莊老闆係佢好朋友，之前搞開批發生意，最近想做埋零售，所以就贊助佢哋今次活動，順便當宣傳，互惠互利咁話。
百利達酒莊都幾豪爽，據郭Sir所講，酒莊今次冇設贊助上限，「你飲得到咪畀你飲，冇問題㗎」，但郭Sir補充，「你四十幾人（參與），一人斷估都飲唔到一支喇，我就唔識飲酒嘅。」
郭Sir最後話，如果今次活動反應熱烈，而佢老友又願意嘅話，希望之後可以定期舉辦類似活動喎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
