大行炒作有鋪排
2018年02月22日
美股喺傳統零售大股沃爾瑪股價大插下，低收超過200點，但港股無受影響，指數在狗年第二個交易日轉跌為升，下午升幅擴大，收復首日失地。初步睇農曆年前偷步炒高後，初五開市見紅盤出貨，但大市其實無大沽壓，兼且又炒定內地復市，所以倒頭升，且看市況能否維持
小回大漲，慢牛向前。
比亞迪又炒上
美股跌本來不利港股，杜指去年大升，在美國長息面對3厘心理關口下，港股好難再學似去年升勢如虹，問題反而係可唔可以發揮到估值較低的優勢，在美股放緩機會日增下，吸引到資金流入本地，跑贏外圍。美資大行摩通發表報告，認為MSCI中國指數自102點高位回落7%，主要都係美股技術調整所帶動。該行認為由於內地數據顯示經濟活動穩定，投資者可以利用調整機會買入。
今年年中，A股會正式加入大摩全球指數，好多大行都睇住呢個變化，學似摩通咁建議投資者趁調整儲入A股券商，相信都有一定數量，畢竟上證指數O依家喺3200點浮沉，同全球主要指數比真係唔貴。
除了大市外，摩通同時對個別股份作出推介，除左平保(2318) 呢啲大路股，亦建議投資者考慮吸納比亞迪(1211) 同蒙牛(2319) 。
比亞迪去年第四季股價表現可以用大上大落形容，股價喺一個月內由50元爆上83元水平，之後再由高位插番落60元邊。踏入2018年，佢股價回復慢步向上。比亞迪股價急上後再急落，可以解釋係內地提出要以電能車加快淘汰傳統汽車，令做電能車的比亞迪大有概念，之後投資者開始擔心其他大型汽車生產商加入競爭，會令比亞迪喪失優勢，市場情緒由亢奮冷卻落嚟，令股價出現調整。從走勢嚟睇，佢股價喺60元水平搵到強大支持，開始重新進入上升軌。
呢個月18日，比亞迪在投資者互動平台上發表新動向，表示公司屬下唐二代燃油版預計在第二季度上市，雖然具體價格尚未確定，但一定會價有所值。對於有投資者提出推出量產型跑車，公司回應是準備「以高端產品來提升自身產品競爭力與客戶口碑。」
另一個對電能車有關的概念，同2、3月興炒政策有關。早前國家財政部等四個部委發佈新能源汽車補貼《通知》，從今年2月12日至6月11日過渡期期間，新能源乘用車、新能源客車補貼標準為原來七成，新能源貨車和專用車更降至四成，但燃料電池汽車補貼標準維持不變。今次補貼新政策一大特色是提高補貼技術門檻，最低檔位補貼金額下降，最高檔位金額不減反增。其中純電動車續航能力補貼門檻，從100公里提升至150公里，補貼檔位由三個增至五個。從炒作角度嚟睇，唔排除大行會喺第二季新車上市前，搵機會炒炒。我哋睇好比亞迪，可以見回吐就逢低吸納。
國指跑贏大市
睇番個市，昨日都係國企股強過大圍，恒指收報31431點，上升558點或1.81%；國企指數收報12686點，升左290點，幅度相當於2.3%，內地未復市，無左北水下，成交只有968億元。
滙控(005) 派完成績表被人沽一輪後反彈，回升0.8%，收報81.6元，佢有好多次都係咁，叫做業績唔太符合期望插一插，但係其實業績都唔算差，維持回吐吸納建議，賭息差擴大有利滙控。
內銀股表現仲靚，建行(939) 升2.8%，收報8.56元；工行(1398) 急升3.3%，收報7.11元；中國銀行(3988) 升2.55%，收報4.42元。
陸羽仁
金融High Tea 舊文
來源 source: http://hdfin.stheadline.com
