經濟客艙：
100萬做日本酒店大亨
■日本嘅地產代理同香港差唔多，貼滿筍盤簡介。 資料圖片
中國人愛到日本玩，有錢嘅中國人更愛買日本樓，為資金尋找出路，期望投資有回報。適逢日本將於2020年舉行東京奧運，大阪又競逐2025年世博主辦權，今日今日仲靠日圓低水置業撈大
客，未足以滿足購買力最強勁的內地客。
大阪市中心走一趟，日本橋附近三步一間藥妝店，五步一間地產代理商。地產代理同香港嘅差唔多，貼滿筍盤簡介外，都有加入「投資移民」簡介。原來近年日本地產代理開闢「海外買酒店項目」兼移民，簡介不再以日圓低水為重點，反而係投資酒店項目，落成後有得住（送每年5日免費住宿兼來回機票）、又有得賺（聲稱6厘淨租金回報），兼且以投資移民為賣點。投資金額可為兩期支付，簽約後畀1,000萬日圓，落成後再畀800萬日圓，又免管理費、維修費、火險、水電費同其他雜費等等。
1,800萬日圓即係幾錢，折合約131萬港紙，真係聽見都覺又平又好抵！作為精明嘅投資者，買樓並非買菜，價錢越平非越好，中伏機會亦越大。2020年東京奧運兼大阪爭逐2025年世博主辦權，日本大財團也積極加入投地興建酒店，京、阪、神同東京呢兩年市中心大興土木起酒店，滿足訪客需求。睇返日本報道，單計三菱地所株式會社計劃喺上述地區開9間酒店，最快三年後開幕。外國大型酒店連鎖好都去大阪或東京開新酒店。
日本瑞穗資訊綜研發表報告，去年推算2020年京、阪、神同東京將出現酒店客房供應短缺。不過，今年1月調整報告嘅預測，由原先供不應求，成為供過於要，預測全國兩年後將會出現45萬間酒店客房過剩。有日本地產市場調查亦估計，全日本酒店建成量急增，喺東京、大阪、北海道、名古屋、仙台、京都同福岡等地方，2017年至2020年期間合計有8萬間新酒店客房，亦多過一年前6.5萬間預測，當中以京都同大阪預測增長最勁，分別錄57%同42%。
數字反映，奧運同世博燃點起日本淘金夢，期望兩大主題盛事吸引海外旅客搵錢。不過，畀一球多啲啲就可以做酒店大亨兼投資移民，呢個究竟係咩概念，我會話：「咁都畀你諗到！」
FB: https://www.facebook.com/seeforcaptain/
Captain Cool
經濟客艙 - Captain Cool 舊文
來源 source: http://hk.finance.appledaily.com
