魚樂無窮：炒賓仕睇兩個位
■名牌奶茶概念賓仕國際首日掛牌不負眾望，狂升3倍。資料圖片
挾著名牌奶茶概念嘅賓仕國際（1705），首日掛牌不負眾望，狂升3倍，主板新股首日有如此驚人升幅，印象中絕無僅有。
本欄提過開市價較暗盤價高的話，則值得放手一博，如果有跟住做，賬面計都有近五成利潤。
冇貨嘅話仲博唔博？瘋狂炒作誘惑當前，叫你忍手好似阻人發達，吼實重要價位操作更實際。
第一個係全日平均價3.087元，保守的可等調整至呢個水平才入場；第二個係上市高位4.05元，呢個操作模式更簡單，升穿便合埋眼衝，然後自訂止賺止蝕。
你話咁同賭大細有乜分別，我話你知真係冇分別，但氣氛旺爆及趨勢向上，贏面相對較高。記住，新股只炒供求，風險與回報是共存的。
眾安在綫（6060）日前宣佈將修訂公司章程，爭取成為首批全流通H股，迎合中證監政策，消息一出股價即踢穿70元大關，從炒作角度出發，持有眾安8,100萬股內資股的百仕達（1168）更值博，無他，總值57億元持股有機會套現，較其市值41億元還要高，一石足以擊起千重浪。
百仕達今日放榜，已有盈喜護身，雖然盈利屬一次性，但肯定不會有驚嚇場面出現。眾安本月26日開會前，百仕達點都要睇實！
唐牛
http://fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.finance.appledaily.com
