中環在線：賓仕仙氣太子女 勁似章子怡
■賓仕噚日上市，陳錦泉夫婦帶埋乖女Tinny（左）現身。
飲品店「天仁茗茶」香港特許經營商賓仕國際（1705），靠珍珠奶茶喺股市賣個「滿堂紅」，噚日上市就冇珍珠奶茶飲，不過現場就出現咗一位青春少艾，充滿仙氣，某角度睇仲有啲似少女版章子怡㖭。原來
呢位靚女係賓仕主席陳錦泉嘅「無價珍珠」大女Tinny，專登晨早起身撐爸爸。
牛津攻讀法律碩士
陳錦泉好自豪咁話，大女係資優生，喺香港完成中學課程，就赴笈英國牛津大學，20歲畢業，仲要拎埋一級榮譽，家陣喺牛津繼續攻讀法律系碩士，明年就畢業。照咁講，佢大女真係美貌與智慧並重，唔知會唔會成為下一個麥明詩呢？陳錦泉話，Tinny畢業後唔會加入公司喇，應該跟從媽媽、賓仕執董田巧玲一樣做律師。
除咗Tinny，陳錦泉仲有位細女同孻仔，兩位噚日都冇出現，皆因細女喺英國劍橋大學讀緊法律系，孻仔就喺倫敦哈羅讀書。
個個仔女都喺名校讀書，咁叻可能係有先天優勢。事關陳錦泉係香港大學畢業生，聽聞仲係「志雲大師」嘅師弟，而佢太太田巧玲喺英國倫敦大學畢業，家陣仲有做律師㗎。一家五口都咁叻，佢哋身家仲跟住股價水漲船高，真係人生勝利組！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
