中環在線：安永撤出金鐘 花生友賴佔中
■座落中信大廈嘅安永即將遷出由金鐘搬去鰂魚湧。資料圖片
四大會計師樓座落喺香港金融中心地段，不過有一間即將遷出，仲要由金鐘搬去鰂魚湧，嗰間就係安永喇，唔知對核數師嚟講係好事定壞事呢？
話說安永總部本身喺中信大廈，隔籬係香港政府總部，勝在交通方便
，但就冇咩好食。嚟緊搬去太古地產旗下嘅太古坊一座，雖然要搭多5個港鐵站，搭車時間長咗13分鐘，但唔使再逼喺海富食飯咁淒慘，相信唔少核數師會幾開心。
太古地產高層之前都賣花賺花香，話灣仔繞道最快今年底落成，由中環揸車去鰂魚湧好方便，而且太古坊一號又新又靚，租金平過中環多多聲。
太古坊新址租金平三成
聽講，安永租咗太古坊一座八層，樓面16萬方呎，按呎租60蚊計算，月租大概要960萬。根據以往資料，安永喺中信大廈租咗15萬方呎，按呎租90蚊計算，租金成1,350萬元，平咗差唔多近三成。
有花生友同華華講話，2014年佔中期間，中信大廈係重災區，聽聞安永高層好𤷪𤺧，覺得阻住做生意。近排樓下公民廣場重開，唔通係搬總部其中一個原因？
太古坊一座今年第三季將會落成，家陣四分三嘅樓面已經租出。查實市傳總部喺太子大廈嘅羅兵咸，一直想搬總部，唔知有冇興趣東移呢？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
