敲冷股要計數
2018年03月16日
港股上星期插到近上升軌後反彈，暫時脫離穿底威脅後，略為轉穩，市場轉而炒吓個別，有啲冷股都郁郁吓。股民喺呢啲市況，追熱門唔夠位轉身，有時都會心郁郁跟吓，但呢啲冷股市場消息唔多，買佢哋真係要計清楚條數。
昨日有隻冷股安寧(128) 炒上12%，
逼近幾年來高位，特別係交投都幾活躍，昨日成交7478萬元，以一隻15.2億市值股票計，成交好大。中環茶友中有「考股專家」，對呢類冷門股甚有興趣研究，佢話安寧呢幾個月炒炒吓，相信係有報道話公司向城規會申請改變屬下顯達鄉村俱樂部，於是資金投機炒作。
安寧炒重建炒足20年
考股專家話，安寧炒俱樂部重建，無傳20年都傳咗15年，久唔久就會炒吓。過去高追一綁就幾年，都幾難玩。今次佢真係郁手，向城規會申請將顯達改為起樓。牌面睇，政府O依家鬧地荒，連粉嶺高爾夫球會都話會拆咗佢用作起樓，照計顯達改用途理應接受，關鍵只係交通等因素。安達呢次申請將塊地改為住宅乙類6用途，即係低密度單位，相信都係考慮咗呢個因素，所以有一定過關機會。
如果要炒佢安寧塊地起樓，咁塊地值幾錢呢？呢塊地面積40萬方呎，如果按申請用途起2.5倍，即係起100萬呎。如果以公司O依家市值15億計，唔計其他只計塊地資產，除開即係每方呎1500元。
不過，會所地起住宅要補地價，咁補價要補幾多次就係關鍵。如果以最近安達臣道無港鐵的地賣1.2萬元計，如果補地價五成，咁咪要補6000元，如果補六成，咁就補7200元。如果六成計，咁即係未補地價前每方呎值4800元，三十幾年前佢用600萬買塊地，等如樓面呎價六元，升值800倍，成幅計就值48億元，折合每股接近三元。
以三、四線無息派的地產股仔，呢個折讓中規中矩，所以投機價值係要睇成事機會同管理層會點搞。安寧大股東係華懋，佢亦係安達臣道地皮買家，安寧本身無乜人手，亦無乜財力，若然真係重建地皮，必然要同財團合作。理論上大股東係首選。
考股專家計完一輪數，咁覺得買唔買得過呢？佢話咁就真係要睇買股策略同目標啦，安寧炒重建會所炒咗咁多年，O依家好似真係有眉目，如果有貨當然可以睇落去啦。若然無貨去追，咁就要留意佢無乜賺錢生意，自然亦無派息能力，雖然佢資產豐厚，但如果揸咗隻股等錢開飯，咁就唔係幾穩陣。
太古穩健有餘活力未足
講完冷股，茶友又討論下老牌藍籌太古(019) 。太古公佈去年業績，股東應佔溢利260.7億元，按年增加1.7倍，A股(019) 每股基本盈利17.34元，B股(087) 每股基本盈利3.47元，A股第二次中期息派1.1元，B股第二次中期息派22仙。不過，太古業績好多數字係重估，普通股民唔係咁識睇，茶友粗略睇睇，話佢幾瓣業務，最令人有印象都係國泰(293) 下半年業績好番，有啲見底跡象。最賺錢仲係地產部門，另外飲料部門和貿易及實業部門業績都提升，只係不足以抵銷航空部門和海洋服務部門業績跌幅，好彩係兩者都已經有啲見底跡象。太古整體都係質素有餘，策略稍為保守，如果管理層能夠稍為「動起來」，股價可能有好啲表現。太古派完成績表後微升，收報80.85元，升1%。太古地產(1972) 股價亦靠穩，升1.3%，報27.9元。
陸羽仁
金融High Tea 舊文
來源 source: http://hdfin.stheadline.com
