金手指：樓市剛需有幾剛？
■香港銀行同業拆息仲好低，不過一鬱嘅時候，就會學股市二月時嘅速度。資料圖片
首先，我呢十幾個月來叫大家不問價追嘅彩星玩具（869），噚日舉行董事會，應該就係要通過全年業績。不過，喺落筆呢刻，未見出台，唯有下周再交待。
禮拜一，恒指跌七百。一條長長嘅陰燭，唔係裂
口低開橫行。主要原因，係啲好消息，例如美股上周臨尾抽升、德國默媽繼續做總理等，一開波令人開心。不過啲壞消息，例如特朗普「貿易平等」舉動、意大利選民基本上選咗脫歐做大多數，就係慢慢滲出。
建制失勢之勢，全球繼續。因為建制偽善嘅證據，越來越多人覺悟，打著民主旗號嘅歐盟，就係反民主。鬧特朗普打貿戰嘅國家，全部收嘅關稅都多過花旗國。而高呼愛國愛黨的，啲領導就個個揸或想揸外國護照。連我最支持司長陳茂波嘅守財奴政策，都喺後門開咗好多一炮輸大錢嘅高鐵式「投資方案」。難怪香港人係咁要求派錢，因深信橫掂都會敗曬，不如分家產。大家都知，財政儲備就係我哋兩制最後防線。即大家嘅理性要求，其實只係反映我哋全部已見到香港嘅終點。
最後，美元一個月銀行同業拆息，升勢加速。香港樓市我唔估價，我估成交量。香港銀行同業拆息，到𠵱家仲好低，不過一鬱嘅時候，就會學股市二月時嘅速度，到時，就睇嚇啲「剛性需求」有幾剛。聯儲局唔通真係撥亂反正，將最終極嘅偽善結束？賭錢輸咗，唔通將會冇人叫你做「苦主」救你？
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com
