Can Bank：財爺會轉軚派錢？
■陳茂波連日四出解讀預算案，一再重申唔會派錢。資料圖片
上周三發表財政預算以來，財政司司長陳茂波連日四出解讀預算案，又一再重申唔會派錢，但社會上要求派錢嘅聲音則有增無減，政黨對此更是步步進迫，呢啲錢到最後究竟派唔派？
政府上次派錢是2011年
，當年財政司司長曾俊華建議取消退稅，但向打工仔強積金（MPF）戶口注資6,000元，措施被認為係益哂基金經理，令民怨爆發，最終曾俊華都要跪低，向市民派6,000元。
曾俊華做財政司10年，就真係只得一次派過錢，之後就被批評無遠見、短視之類；之後年年有盈餘，曾俊華無再派錢，但卻被指是守財奴。相信市民預期今次預算案會有錢派，都係因為預期陳茂波會改變過往曾俊華的理財風格。
今次派錢聲音強烈，令筆者回想當年政府派的6,000元究竟用咗去邊度，筆者堂弟就用咗呢6,000元蒲咗幾日籣桂芳，筆者本身點使就真係唔記得咗。其實要求派錢，不外乎是對政府不信任或者不滿，包括唔信政府可以好好管理啲錢，不滿貧富太懸殊，錢總希望在自己身上之類，有幾多真係等佢幾個月立法會通過，再一輪後期安排之後，拎筆錢嚟救急？
當年曾俊華在2012年預算案後，民望大跌促使當年要派錢救亡，今年陳茂波的預算案就繼續退稅，雖然根據港大民調得分只有48.2分，是11年來最低，而根據中大最新民調，陳茂波得分亦只有49.6分，未到合格水平，但當年曾俊華派錢後，結果兩面不討好，在前車可鑑之下，相信陳茂波今次亦不會輕易轉軚。
散子
散子
Can Bank - 散子 舊文
來源 source: http://hk.finance.appledaily.com
