魚樂無窮：今年點樣炒落去
■股市走勢未明朗，人心虛怯，贏錢變得更難，投資者宜用注碼控制風險。資料圖片
雖然2018年只是過了兩個月，但股民的體會已足夠講一年甚至更長。
1月份雞犬皆升，恒指幾乎日日創新高，夠膽買定離手，贏錢易過食生菜，衍生工具變成印鈔機。2月份形勢大逆轉，美股由高位急插
，道指跌千點變成家常便飯，港股作為世界級提款機，自然首當其衝。
恒指最新跌穿30000點，睇睇自己倉位，表現是否較指數優勝？如果答案係yes，你已經KO唔少對手，唔信問問身邊的朋友，今年由贏變輸的例子肯定不少。
老老實實，冇人能夠預知高位在哪，創新高之時繼續在市場打拼，一定要有輸最後一注的心理準備。點樣先可以在退潮時仲有底褲著？關鍵在於以整個倉位決定去留，而非用個股去衡量，即是我經常提到的每日也要為portfolio計數，如果有跟足指引去做，全身而退其實唔難。仲未學識呢個股市求生術？快快重溫過往專欄吧。
餘下10個月會點樣？從心理學角度出發，人心虛怯下贏錢會變得更難，事關你唔敢再重注坐貨，取而代之的是遊擊戰。講真，有幾多人可以靠短炒發達，唔輸已經偷笑啦。在走勢未明朗前，繼續用注碼控制風險吧。
唐牛
http://fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.finance.appledaily.com
