貿戰加騰訊 雙鬼齊拍門
2018年03月23日
美國宣佈加息，同時估計今明兩年利率都有調升空間。新主席鮑威爾話美國產能使用率增加，無令到通脹有加快升溫跡象，調子唔鷹，美元即跌。美國利率逐步提高，變相削弱左債券同股票吸引力，鮑威爾要順利令利率上調趨向正常，就要小心翼翼，如履薄冰，唔可
以表現得太鷹，以免嚇到股市大冧。
跌幅僅指手畫腳級數
議息結果公佈後，美股由升轉跌，杜指收市回落44點，港股開市偏軟，中段一度反彈，但尾段再跌過。美息三月份加息係意料中事，市場估計下次開會議息唔加機會有近七成，本來消息證實，加上呢幾日公佈業績普遍唔錯，個市有條件炒番上去。下午指數再度受壓，陸羽仁覺得同香港金管局跟住調高指導利率關係唔大，因為市場利息有排未加，反而係因為周五美國對華徵收關稅細節揭盅有關，市場擔心會引起貿易戰，呢個係新增不明朗因素，而且美國總統特朗普作風好難估，於是大家避避風頭先。
特朗普將簽署針對中國貿易備忘錄，估計方案可能包括限制中資在美投資，以及對至少300億美元總值的進口中國產品徵稅。《華爾街日報》引述知情人士話，如果美國總統特朗普對華實施大範圍關稅措施，中國將通過對那些請左特朗普支持者行業和州份進行反擊。特朗普係生意人，搞貿易戰有無着數應該心知肚明，佢O依家的做法不妨視為幫民主黨中期選舉招數。去到緊急關頭會嚴重影響股市以至選舉，佢就應該會識做。
喺大家晒牌鬥大過程，如果股市唔跌番吓，點會似係認真？以港股受壓回落343點計，如果中美爆發貿戰又點止跌咁少，呢個幅度只係等同指手畫腳，根本未係真正郁手，具體情況要睇美國開出來張菜單，同埋中國要美國點樣找數。
股王長期大股東終沽貨
喺跌市中，「股王」騰訊(700) 雖然去年全年錄得純利715億元人民幣，按年飆升74%，勝過市場預期，但市場關注係去年底集團推出手機射擊遊戲《絕地求生》，未能刺激第四季手遊收入，單計第四季遊戲收入增長放緩，所以大行對佢前景睇法分歧，普遍而言就算繼續睇好，但都無明顯調高目標價。結果騰訊(700) 急挫5%或23.2元，收報439.4元；受沙地阿美擱置海外上市，以及CDR加入搶客消息影響，港交所(388) 再下滑2%，收造264元。另一隻績優股吉利汽車(175) 再急跌2%，收報25.25元。喺強股回調下，恒指收報31071點，跌1.1%；國企指數收報12427點，下滑94點；成交金額1519億元。
雜誌《100毛》及毛記電視的母公司毛記葵涌(1716) 昨午截止公開認購。市場消息透露超購逾6000倍，成為史上新股「超購王」，遠高於已賣盤的Magnum(2080) (現為奧克斯國際)超購3558倍，凍結資金約486億元。綜合多間券商數據，有逾1100張「頂頭槌飛」。
毛記成為超購王，但證券界業遍唔睇好，耀才證券研究部總監植耀輝直言不看好該股，因該公司最近一年業績倒退。他建議投資者若抽中該股可先揸兩三日觀望，股價從高位回落時應及時抽身，股價急升時不建議追入。金利豐證券研究部董事黃德几直言，近期現「新股認購熱潮」，毛記葵涌的超購是供求關係失衡，而引致的不合理「喪炒」，提醒投資者應謹慎看待。
毛記招股告一段落，炒揸左佢7.5%股權的世界華文(685) 都急回17%，收報1.79元，呢個價比佢起步價仲高左成倍。世華本身無乜概念好炒，借住毛記短炒一轉，應該好快夢醒，但大戶撩高要甩身，唔排除遲吓繼續製造波幅派貨，總之喺佢跌番去0.8元起步點前，接貨都有接火棒危機。
陸羽仁
金融High Tea 舊文
來源 source: http://hdfin.stheadline.com
