操盤手劄記：貿易戰「防彈」股
■東嶽為中國最大嘅氟化工企業，美國出口只佔營業額3%，影響唔大。資料圖片
睇美中貿易戰，就好似睇兩國玩話事啤（Show Hand）。兩國各自拋出500億美元關稅注碼（Ante）後，美方再加注（Raise）1,000億美元關稅。今個回合，美方打出「中國
製造2025牌」，中方則打出「大豆牌」鬥大，嚟緊係咪會打「美債牌」，甚至打「匯率牌」呢？
牌路未摸清，周一就見人民幣兌美元官價貶值0.3%，市場即刻吱吱噚。不過，周日晚美國總統特朗普喺twitter扮friend，加上白宮放風兩國正在透過秘密渠道講數，美股期貨應聲反彈。港股借勢衝上三萬關，主板成交增至1,152億元。
係囉，埋枱傾咪好囉。不過，喺傾掂數之前，金融市場難免繼續波動。中美貿易問題，唔係齋睇順差逆差，仲要睇邊個賺更多錢。美國雖然有貿易逆差，卻有利益順差，打貿易戰無著數。特朗普係生意人，生意人講利益，喺經貿上鬥大，只係逼對方讓步嘅過程而已。
貿易戰始終硝煙未散，揀股要睇關稅清單，趨吉避凶。貿易戰都有「防彈」股，可以喺中國關稅清單中著手。中國將會加徵關稅嘅商品，包括大豆、汽車、化工產品等。講到化工，我就諗起2007年尾挾「中國杜邦」之名上市，中國最大嘅氟化工企業東嶽（189）。
東嶽主要產銷環保製冷劑、高分子材料、有機矽等，亦有研製燃料電池膜同其他功能膜。集團3月尾派成績表，多賺1.7倍，好過預期。由於股價自舊年6月復牌到年尾計已累升三倍，今年首季再升四成，放榜過後，獲利沽盤湧現。不過，貿易戰對東嶽嚟講，反而可能係機遇。
集團目標係將頂級化工產品國產化；美國出口只佔營業額3%，影響唔大。管理層預期，喺頂級化工產品帶動下，今年盈利可望保持增長。另外，集團打算將剛重組嘅有機矽公司分拆喺深圳上市，今季隨時落鑊。現價7.21元，市盈率7.5倍，息率4.2厘，可逢低收集。
割柑人
本欄逢周二刊出
割柑人
操盤手札記 - 割柑人 舊文
來源 source: http://hk.finance.appledaily.com
