中環在線：
滙豐緊跟習大大一帶一路國策
■滙豐最近新成立
亞太區「一帶一路」（BRI）部門，又喺廣東成立滙豐中國首個「創新與科技業務團隊」。
炒股要搵國策股，做生意亦要緊跟國策，喺呢方面，今次滙豐控股（005）真係反應好快。隨住習大大提倡「一帶一路」與大灣區建設概念，獅子行最近新成立亞太區「一帶一路」（BRI）部門，又喺廣東成立滙豐中國首個「創新與科技業務團隊」，打算食曬兩條水咁話。
開部門配合大灣區發展
滙豐呢個星期一至三，組團上珠三角研究一帶一路，舉行策略路演，有新任舵手範寧、各高層領軍，聽講行程緊密，好似到訪集團位於前海、剛開張嘅滙豐前海證券公司，跟內地官員同滙豐客戶見見面，路演會傾一帶一路商機、滙豐喺數碼化、財富管理、保險業務等各方面進展。
咁啱得咁蹺，滙豐噚日宣佈新成立亞太區一帶一路部門，專責一帶一路事宜。呢個一帶一路部門，就由服務咗滙豐36年、經驗豐富，現任馬來西亞滙豐行政總裁Mukhtar Hussain，做部門主管，7月1日起生效。佢話會負責帶領集團喺亞洲一帶一路區域發展，並推動更多唔同地區合作。
唔止咁，滙豐最近喺廣東同香港，設立服務創新科技企業嘅工商金融業務團隊，配合粵港澳大灣區機遇發展。滙豐話，過去3年，喺廣東地區嘅高科技企業客戶數量已經倍增；滙豐喺香港亦成立「創科企業及生態圈夥伴合作」團隊，新管理層似乎真係好積極咁喎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
