智取大市：炒大團圓結局？
■周大福有六成收入來自內地，所以減關稅點都唔會輸。 資料圖片
習近平以溫和方式淡化貿易戰威脅，加上提出擴大開放，喺中美埋枱傾關稅之前，講明有進口產品會減關稅，刺激港股大幅反彈。至於俄羅斯股市因為美國財政部制裁而大跌，究竟普京會唔會有下一步行動？但能夠分散市場
注意力，對短期港股未必係壞事。
中美紛爭絕對唔會呢一刻完結，但貿易戰短線最壞消息面可能已見，股市三兩個月內，有條件炒到反映「貿易戰已完」、齊齊上天台BBQ大團圓結局嘅一幕，但長線會唔會變咗上IFC天台？就係後話。噚日港股炒起受貿易戰拖累程度較大嘅航空股，總之跌得多就反彈得快，估計呢一刻持貨，數周後相信有更高價摸出，過程難料，因為未擺脫政治市。篇幅有限，有勞各位喺小弟舊文睇返原因。
習近平提出減關稅，對內需消費行業影響好個別，原因係民生用品嘅關稅本來聊勝於無，而對於奢侈品而言，消費稅同埋增值稅先係重點所在。金舖周大福（1929）有六成收入來自內地，所以減關稅點都唔會輸。睇返佢舊年第四季內地零售值增長12%，同店銷售升5%，原本仲以為香港表現麻麻，但香港2月整體零售銷售額按年升29.8%，睇嚟周大福已全面步入復蘇，值得候調整吸納。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
