Money Walker：貿易戰落幕然後呢……
■貿易戰鬧劇有望落幕，不過為咗爭取共和黨選票，特朗普應該冇咁快收工住。資料圖片
中美貿易戰發展一如所料，特朗普步步進逼下中國讓步，開放內地市場兼加強保護知識產權，並未企硬至最後一分鐘。
中美雙方對於貿易戰一直都係口頭上
兇狠，加上貿易戰負面消息拖累美股大跌，對共和黨中期選舉選情百害而無一利。反過來講，中國減買美債同貶值人仔，亦唔見得對自己有乜好處，因為控制不宜隨時再度引發走資潮。
不過就算消除貿易戰呢項不明朗因素，今年環球市況相信都唔會有去年咁強勁，畢竟各國央行貨幣政策收緊下，市場流動性冇去年咁寬鬆，科技股亦因監管同智能手機周期延長而不復強勢，其他行業再強亦始終不及以往嘅科技股厲害，加上美國經濟周期已步入後段，盈利前景進一步增長空間不如一、兩年前。
至於匯市方面，筆者最關心貿易戰過後，美元會否擺脫近月橫行走勢。美元之所以唔上唔落，主因係聯儲局加息預期近兩個月冇大變動，歐央行同日本央行亦於收水上再冇大動作。唯一較特別嘅係，特朗普呢排提倡保護主義，支持美元最近數周略為走強，貿易保護因素退卻或意味美元會回軟。
貿易戰鬧劇係就係有望落幕，不過為咗爭取共和黨選票，特朗普應該冇咁快收工住。始終搞掂外貿之後都仲有墨西哥邊境圍牆、亞馬遜稅務處理手法、北韓問題等等慢慢玩，外圍股市波動恐怕陸續有來，可幸呢幾單野對中港股市未來嘅牽動，應該較中美貿易戰來得間接。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.finance.appledaily.com
