笑到最後：中國萬億救市？
■特朗普政府全面發動貿易戰嘅機會唔低。資料圖片
港股反彈力度越來越弱，同以往不同，如果係牛三前大調整震倉，好少會調整咁耐，淨係抽隻騰訊（700）出嚟睇，如果405蚊係鐵底，冇理由畀你喺呢個水平買完又買，然後先炒上去等400蚊接貨嘅人齊齊發達。機會唔係冇，但唔
符合一般莊家震倉收齊貨炒上嘅股市邏輯。
另一方面，如果你做淡友，一樣面對壓力，今年經典模式係：特朗普發佈末日式壞消息→下屬做和事佬→中國發佈利好消息。結果係跌完又升返。點解高明咁有感覺？因為今年高明博兩邊都博過，全部結果都係買入後畀少少甜頭你，當你以為行大單邊時，就相反方向挾死你，左右兩邊都打腫曬。
高明之前講過，今年要「清除合理懷疑先會開展升浪」，原來只係啱咗一半，因為跌浪一樣要冇合理疑點先肯直插。
政策市下圖表同數據作用都不大，惟有靠估。高明預言，特朗普政府會全面發動貿易戰，然後中國會推出萬億救市措施。呢個情況出現機會唔低，因為：
（1）一條30年前嘅短片流傳，特朗普喺電視台節目入面講對付貿易逆差，唔好畀其他國家佔美國便宜，只係當年主角係日本，今日係中國。證明特朗普處心積慮想打貿易戰，並非只係「商人討價還價」。
（2）特朗普稱普京「朋友」，結果對俄羅斯經濟制裁，反而諷刺金正恩係「火箭人」，就同佢和談。特朗普都多次話同習近平係朋友，睇嚟條路都會行多次。
（3）美國對中興（763）禁運芯片，中國就話係「中國芯」嘅契機，同一道理，如果中國貨被打關稅，就自己買返曬，曬冷萬億救市。
如果發生呢個情況，全面發動貿易戰後大跌3,000點，中國又未公佈任何對策前，值得低位買入博救市措施。
高明
http://fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.finance.appledaily.com
