智取大市 - 晉佳 2018年4月23日
智取大市：不容有失的一天
■呢個周末日利好消息不斷，如果港股今日不升反跌，後市難樂觀。 資料圖片
上星期五係中興通訊（763）禁令之後，股市明顯轉弱嘅一日，回顧返有啲似3月21日，美國計劃向中國加徵關稅消息之後幾日，市況慢幾拍、遲幾日先嚟急轉直下，3日內高位跌2,000點，案件重演嘅話咪話唔驚。
不過，呢個周末日利好消息不斷，金仔停止核試再話專心搞好經濟、美國監管機構容許中興提交更多證據、美國商務部將同中國進行經貿問題磋商，令到周一正好成為後市溫度計，測試好友信心同力量。
以上嘅利好消息，都係針對住近排大家恐懼嘅因素，拮中淡友要害之處。好一個港股挾上、怒殺淡倉嘅好機會，實在不容有失，同時係擺脫日升日跌嘅最好機會，如果咁都不升反跌，後市當然食蕉了。
如果港股真係反彈，近期最受難嘅科網股，自然要會上演大報復，不過，呢個板塊強勢可能短暫。由於基金持有科網股騰訊（700）、fb、蘋果數量太多，面對科技戰、手機行業需求不振同用戶資料外洩事件阻/I大數據發展等等一籃子關鍵嘅長線利淡因素，基金中長線無論如何都要減倉保平安，換馬過程唔會一段短時間完成曬，形成其他板塊遲早有執二攤跑出嘅機會，值得留意。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
