經濟客艙：
後生仔被樓市淘汰
■港樓越升越有，往後幾年，香港後生仔似乎仲未可以改寫買樓靠父母嘅宿命。 資料圖片
瘋狂樓市下，被發掘出來嘅置業故事或有點陳腔濫調，經常看到單位越住越細、納米盤越建越多、又或者香港上車絕望無力等等。不過，只要樓價一日仍未回落，超出普羅大
眾可負擔水平，置業故事揭示了畸形樓市下嘅實況。
剛剛呢個周末睇到有報道話，三代人同住300多呎嘅公屋單位。獲分配公屋嘅業主，決定用20幾萬為窩居進行空間大改造。印象最深的是，負責為單位裝修嘅師傅話，屋主拎畢錢出來裝修，原因係三代人隨時住20或30年，幫埋兒子計劃，他日長大後冇錢搬出去租樓或買樓，點都要為兒子準備一間房。三代住300呎公屋，一戶四人平均計，每人可活動空間約75呎。睇睇統計處2016年中期人口統計數據，全港家庭住戶人均居所樓面面積中位數為161呎，三代人住300呎公屋兼有20幾萬元裝修，已經相對其他好渴望「上車」嘅人幸運。
年輕人成日呻無力負擔昂貴樓價，喺全球樓價同步上升嘅趨勢下，外國物業市場都會出現同香港相近情況。例如英國最近有篇環球物業分析指出，年輕人已經被環球物業市場淘汰。包括香港、紐約、倫敦與悉尼等，樓價越升越高，置業平均年齡亦有增無減。喺香港想升呢做業主嘅平均歲數提升到43，紐約業主歲數就平均高約8個月。雖然上述四大城市樓市熱度不同，但同樣面對可興建住屋用地越來越少，樓市需求依然強勁。如果後生仔冇足夠財力嘅話，好難置業踏出第一步。
不過，香港嘅後生仔相對英美兩國家嘅年輕人更難「重回」樓市，因為港樓越升越有，近年升幅及升速仲拋離咗紐約同倫敦，例如倫敦市中心接近2/5街號物業樓價回落，紐約心臟地帶曼哈頓同布魯克林嘅公寓去年起亦不再被熱錢追捧。往後幾年，香港嘅後生仔似乎仲未可以改寫買樓靠父母嘅宿命。
Captain Cool
FB: https://www.facebook.com/seeforcaptain/
Captain Cool
經濟客艙 - Captain Cool 舊文
來源 source: http://hk.finance.appledaily.com
