經濟客艙：瘋狂樓市兩面睇
■台灣置業門檻較香港低。資料圖片
香港狹窄嘅居住環境，不只讓成人透不氣，也讓無知小孩一晚長大。近日網傳有位小學五年級學生嘅短文，內容講到渴望長大後住面積更大嘅屋，想離開香港，搬到台灣。有說這位小學生未到過台灣，有次於YouTube睇到介紹
台灣短片，對台灣留下良好印象，仲對台灣置業產生憧憬。喺台灣買樓又平又抵又大過香港，又或者關於香港上車難又難嘅問題討論，就好似各大討論區經常出現「台妹好過港女」嘅貼文咁，總帶著少少不設實際嘅幻想。
這位小學五年級學生對香港居住狹小居住環境感到無奈，細路也寫出面對香港樓市嘅「無力感」，只怪香港樓價升勢太瘋狂，日日也被樓價呎價破頂嘅消息包圍，上日有港島太古城私樓千幾、二千萬成交，另一日則有新界粉嶺有公屋自由市場呎價升穿1萬蚊。假如小孩問點解香港啲樓咁貴？我哋住嘅地方又咁細？爸爸媽媽應該點答先最好？
台灣置業門檻較香港低，但如果到台灣唔係買新樓，未必一定有得搭電梯。台灣跟日本與香港社會同樣面臨人口老化問題，全台灣物業的樓齡亦相當高，平均由20年到超過50年。台灣內政部去年6月公佈資料，全台灣平均樓齡為27.9年，樓齡達20年至40年物業錄442.69萬間，佔全台灣總數一半。香港人熱門旅遊熱點台北市，多過40年樓齡物業佔近三成，少於30年樓齡物業則有33%。
假如這位小學五年級學生對台灣充滿熱情同憧憬，由離港赴台置業，改為赴台求學兼打工，然後再置業嘅話，希望有人早啲話畀小朋友知道，台灣畢業生唔會贏在起跑線，兩年前大學畢業生平均起薪為2.8萬新台幣，即係8,000蚊港紙都冇。雖然喺香港就要不吃不喝多17年先買到樓，台灣嘅樓市情況只係好少少，普通打工仔不吃不喝15年先可以上車。
Captain Cool
https://www.facebook.com/seeforcaptain/
Captain Cool
經濟客艙 - Captain Cool 舊文
來源 source: http://hk.finance.appledaily.com
