經濟客艙：被中共擊中要害
■假如中美貿易戰全面開打，對美國大豆農民構成的損失無法想像。資料圖片
談判不只求輸贏，也講求目標如何達成，同時又不破壞雙方合作關係。
中美貿易糾紛過去幾星期越演越烈，沒有人認為屬小事，也沒有人想見到中美貿易問題惡化，引起全球貿易戰，拖累全球
經濟倒退。中美兩國回應對方加徵關稅措施，互相拋窒浪頭，講話語氣一次比一次狠，目的就係希望逼到對方坐低慢慢傾傾，重啟雙邊貿易談判。
近日有評論指出，中美貿易戰打到嚟仲差啲啲，舉例美國對華加徵關稅產品清單公開展示日期，由30日延長到60日。數數手指，即係中美兩國提出加徵關稅措施，今年第三季前未必實施。
中方今次貿易摩擦中決不退讓，因為中央政府捉到攻擊方要害地方，特朗普亦最唔想、亦難以抵擋農民嘅反對聲音。呢批美國大豆農民，主要集中於中西部州份，係特朗普當選總統嘅重要票源之一。適逢美國中期選舉今年11月初舉行，揀大豆加徵關稅，係中方深謀遠慮，即看中特朗普最擔心嘅地方。中方考慮到，特朗普政府為確保選舉勝算，點都要睇實美國大豆農民及相關利益團體。特朗普成功當選為總統，專門種植大豆嘅中西部州份，係特朗普重要票倉。
美國大豆農民最想就係中美貿易平穩，向中國輸出大豆賺錢。中國為美國大豆出口國家，去年出口額達220億美金。睇到有報道話，中國考慮對美國進口大豆加徵關稅後，有美國農民向記者透露，大豆價格每蒲式耳大跌40美仙。若以美國農民每500畝大豆農地計，上述跌幅相當於10分鐘內損失1.2萬美金。假如中美貿易戰全面開打，對農民構成損失根本無法想像。
Captain Cool
FB page：http://fb.com/seeforcaptain/
Captain Cool
經濟客艙 - Captain Cool 舊文
來源 source: http://hk.finance.appledaily.com
