智取大市：消費強股方程式
■潤啤旗下嘅雪花啤酒，喺內地市佔率超過25%，係行業龍頭。今年盈利增長相信會爆勁。資料圖片
上星期五落街，一出lift第一句聽到嘅說話，係街坊向管理員叔叔呻咗句：「又加價啦！」
倘若消費品加價周期展開，通常都能保持一段長時間。目前有復蘇增長概念嘅消費股，券商
預測今年嘅市盈率去到30、40倍，貌似貴到飛起，但個別股份嘅經營槓桿相當高，收入每增長1%，就可帶嚟幾個巴仙盈利增長。
加價證明生產商有把握價量齊升，當然亦要抵銷生產成本上升，但扣除非生產成本相關嘅行政開支後，利潤率仍好大機會擴闊。睇返唔少大行訂立盈利增長預測，其實相對保守。
盈利前景最好嘅係華潤啤酒（291），雪花啤酒內地市佔率超過25%，係行業龍頭。產品年初加價一成以上，復蘇進度比其他消費品強之餘，舊年潤啤銷售費用同行政費用相當於毛利嘅九成，經營槓桿高，執行能力強，同時提高高檔產品比例，今年盈利增長相信會好爆勁。
計及今年盈利增長八成後，券商預測2018市盈率上到43倍，表面睇好誇，但相信未來兩年加價趨勢能夠持續，而券商預測2019年同2020年盈利增長僅兩成左右，似乎被嚴重低估。估值貴係貴咗啲，但相信強者最終能夠越強。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
