金融High Tea 2018年5月23日
等再玩嘢先買貨
2018年05月23日
假前中美貿易戰暫緩，不過市場唔算太興奮。恒指最多升416點，由於個市都彈左一段，喺31000點好多人都趁「好消息」食胡出貨，指數逐步回落，以接近全日低位收市，收報31234點，漲186點；國企指數跌5點，收報12349點，成交金額959.5億元。
中美貿易談判後，有媒體在外交部例行記者會上問中國外交部發言人陸慷，今次達成協議是否只是暫時停戰。陸慷回應以短期來說，如果中美兩國政府能夠達成一個很好協議和雙方都接受成果，兩國政府當然都應當遵守這樣的協議，中方當然不希望出現反覆，長遠就要讓市場規律發揮作用。佢言下之意係暫時無戰事，但中國似乎預左有反覆。
北京態度相信同市場大部份人相似，美國總統特朗普以至成個華府，O依家作風都係佢話點就點，明日的事誰知道，最緊要係自強。《華爾街日報》傳出美國會撤銷中興(763) 禁令，若然係咁會令市場暖風升溫。O依家美國收起硬手，個市彈左，到左比較高的水平，穩陣玩法係保持觀望，等美國佬再玩嘢或回調較多時再買貨。
煤氣走勢有啲轉運
中美聲明包括中方有意增加能源入口，除左石油股，燃氣股都跟住炒番轉。中國燃氣(384) 勁升8.5%，收報32.6元創新高，成為表現最好國指成份股；中集安瑞科(3899) 收漲8.5%，報9.36元；華潤燃氣(1193) 漲4.6%，收造30.5元；昆侖能源(135) 上揚3.6%，收報7.45元；新奧能源(2688) 創新高，收升3.5%，報80.35元。
我在周一早上網誌引述中國商務部研究員梅新育在《人民日報》客戶瑞「俠客島」上撰文，披露中國因為美國天然氣價錢平，形成「價格窪地」，加上液化技術，故此會加大從美國進口天然氣。呢個分析看來有料到，而且獲得市場認同，如果中國加大天然氣進口，宏觀上有利行業，所以燃氣股即時彈起。
睇番成個天然氣股板塊，過去一年其實都已經係處於強勢，好似新奧早兩年長期喺50元樓上不斷攀升，終於借住貿戰消息衝破80元水平。估值上燃氣股一向唔平，好似新奧市盈率去到26倍，息率去到1.3厘。呢個板塊強勢，當然唔係因為早知中美會打貿易戰，而係因為內地為了改善空氣質素，大力扶持使用天然氣，令燃氣公司經營環境大為有利，O依家再多左入口燃氣因素，頗有時來風送騰王閣，錦上添花的味道。
全通急插股東唯有企定
如果從中美貿戰多買天然氣角度，呢個結果其實對唔同公司有唔同影響，好似昆侖能源本身係三桶油屬下公司，氣源主要係來自中亞。如果從美國入口多啲美國天然氣，原來中央執行的西氣東輸可能就會有影響，昆能點樣調整業務去適應新環境仲係唔多清楚，呢個解釋左點解昆能相對升幅無其他燃氣股咁多。不過換一個角度，美國平價天然氣加入競爭，昆能供應商也可能被迫減價。
燃氣股向好，藍籌中可以間接受惠的是煤氣(003) 。煤氣近年因為年年送股，成為散戶捧場藍籌，但之前兩年股價失色，主要係本地市場飽和，加上公司投資新能源業務處於投資期，盈利增長對比其高市盈率變成不吸引。不過今年起，煤氣有點轉運感覺，股價走勢雖然未至好強，但對比起之前表現和其他公用股，表現就有好轉。有熟公司業務人士認為，煤氣轉運有幾個原因，首先係市場飽和，加上之前管理層曾承諾唔加價，藉以同電力競爭，但隨著承諾唔加價日期屆滿，去年公司調整價格，未來由於電力公司增加使用天然氣，電力公司加價幅度上升，煤氣競爭壓力相對減少。加上煤氣近年大力投資煤層氣等替代能源，能源價格低迷下，對公司業務係不利因素，現時全球能源價格向上，對佢就變成好景。再者，內地增加使用天然氣，煤氣透過港華(1083) 可以分享到內地市場紅利。煤氣市盈率29倍，一啲都唔平，只係大環境改變下，呢隻老牛股又變成行得快左啲。
假前炒反彈，但就唔包括有情況的股仔。連插多日的民眾金融科技(279) 假前再度下試低位，曾變仙股，收報0.1元，再跌21%，比高位2元暴跌95%，連帶民眾持有8%股份的中國全通(633) 亦被拖累大瀉，收報0.72元，大跌59%。民眾金融上周五公佈，在深圳上市的民盛(深：002647)訂立的投資意向書已失效，觸發股價大跌。睇翻民眾市值曾炒至200至300億元，經常靠注資消息支撐，大插可以話係遲早的事。至於中國全通過去幾年業績尚算穩定，現時市值14億元，以一間有錢賺的公司睇落唔算離譜，睇番公司喺5月17同18日，連續兩日回購股份，分別涉資199萬元及597萬元，回購108萬股及341萬股，本年度為止公司已累積回購450.4萬股力頂股價，由於佢插得咁緊要，有貨又走唔切的小股東，O依家都無謂咁急跳船啦。
陸羽仁
金融High Tea 舊文
來源 source: http://hdfin.stheadline.com
