中環在線：羅旭瑞股東會 高院兩頭騰
■羅旭瑞在股東會後匆匆答記者幾句就閃。
呢兩個禮拜，財經界花生事，肯定係鷹君（041）爭產案開審，噚日羅老太出庭更加係眾人焦點，佢一班仔女都有到庭聽審，其中，一直企喺羅老太一方嘅世城系主席羅旭瑞真夠頻撲，噚日早上佢旗下三間上市公司開股東會，佢都一早
先去高等法院，差不多夠鐘先去開股東會，下午再走返去高院支持阿媽。
強調「會盡幫媽媽」
羅旭瑞旗下富豪（078）、百利保（617）同世紀城市（355）三間上市公司，噚日朝早輪住喺銅鑼灣富豪酒店開股東會，但羅旭瑞依然十點左右就同女兒羅寶文現身高院，支持咗羅老太先，佢哋聽唔夠一粒鐘，就急急腳走人，去銅鑼灣開股東會，三個股東會夾埋大約一個半鐘。會後，羅旭瑞同羅寶文草草應付在場傳媒提問大約十分鐘，羅旭瑞又返去高院旁聽嘞，你話是咪好頻撲吖。
大家都知道，爭產風波開始之後，羅老太就搬咗去富豪酒店住，羅旭瑞與六弟羅啟瑞一直陪住羅老太，噚日羅旭瑞被人問到，會唔會擔心爭產案影響企業形象，佢就強調，案件與公司無關，「我哋會盡幫媽媽」，大眾對形象自有公論咁話。
佢寶貝女羅寶文又補充，指酒店業前景非常明朗，今年數字理想，陸續會有幾間酒店落成，未來亦會留意大灣區機會，商機無限雲雲。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
