笑到最後：小米合理價16.4元
■小米不獲納入港股通，相信係阿爺要等小米去番合理值至畀佢回歸A股。資料圖片
本來小米（1810）炒上20蚊樓上，高明都心鬱鬱覺得自己睇錯要追貨。滬、深交易所周六公佈，同股不同投票權架構公司股票，暫不納入滬港通和深港通下的港股通股票範圍，再次向整個「同股
不同權」利益集團發出最強烈的反對行動，經計算小米合理價應為16.4元，明顯炒錯！
小米上市前，中央早已對提示過：本來計劃香港和中國同時上市計劃，後來突然只在香港上市之後，稱擇日通過發行CDR的方式在境內上市。同時中國傳媒立即發放輿論，指「小米先在香港上市以後會逐步出現合理的價格區間」，即上市的價位並不合理。
如果你係外資基金，用其他人嘅錢去投資，因為一來唔係自己錢，二來小米早已喺蘋果身上「學」咗好多嘢，買入做組合嘅「遠東蘋果」都算合理。但如果你係香港人，用自己錢買小米，就真係要打手板，可以話過去21年白活。過去所謂「明益」香港人嘅事，例如自由行、CEPA、滬深港通、人民幣離岸中心等等，實際作用最多只可以話係互利，談不上「益」。
今次同股不同權官方大肆話「把握機遇」，比你更清楚呢類同股不同權企業嘅「阿爺」，選擇將呢個機會留畀你，唔通佢賺夠？唔通佢想畀啲人賺？
當然，最終目的都係用合理值回歸A股，何謂阿爺眼中嘅合理？上一個浪試過一次，就係港股直通車，2007年11月3日溫總叫停，當時恒指31,783點，到2014年11月17日變種嘅滬港通先通車，恒指為24,313點。唔計中間起跌，用7年時間跌定23.5%先覺得合理。
中央叫停同股不同權入港股通，等同溫總煞車，小米現價計回落至16.4元，再無限橫行一段長時間，中央先會覺得合理。小米追揸沽，高明會企喺阿爺嘅同一邊！
高明
http://fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.finance.appledaily.com
