財經評論：萬惡樓為首
■無樓苦，有樓也不見得樂透。 資料圖片
做人父母日捱夜捱，不過是為了家中兒女，有樓者，十居其九都是留給子女。古有覬覦皇位，弒父篡位，今有等天收的忤逆子搶完老豆層樓，再趕出門口。無樓苦，有樓也不見得樂透。
大陸老友多年前內地老屋被徵收，賠來幾百萬人仔，舊村還年年派錢。父死無
福享，母親健在來享福，一間爛屋換來一間見得下人的商品房。其後抵押自住樓買多間，一間自住，一間收租，坦言為了兒子的未來。
一孩政策鬆綁，年多前再添一丁，港樓升得癲，大陸樓也不遜色，收租層樓升值外，舊村年年派錢也儲得幾年，嫲嫲決定買多層樓給次孫，當日睇樓時帶同7歲長孫，嫲嫲得意忘形說出：「買給你的弟弟！」，無心插柳觸動長孫神經反問：「那我呢?」弄得嫲嫲說早了不該說的話：「嫲嫲那層給你！」老友長期呻阿仔難教，尤其不做功課不讀書，有次發爛渣罵他：「不讀書要睡街！」，兒子駁咀：「我有嫲嫲的樓！」，氣得他幾乎吐血。小時有樓了了，不作勞改，大來欠債賣樓，一定瞓街。
這邊廂富三代有樓唔做功課，另一邊廂一個足球迷wha"sapp群組，有廿歲出頭新谷友的老豆死後留落2層樓，獨生子，無人爭，一層自住，一層收租，朝朝起身呻飽暖空虛寂寞冷。
樓是毒！磨滅無樓人的意志，蠶食供樓者的荷包，蹂躪有樓者的心靈。無樓葡萄有樓，有樓回味昔日一家在爛屋的歲月。有條宣傳片做N個街訪，問市民有1,000萬想做啲乜，竟然清一色答：「買樓！」樓毒蔓延禍害深，人人心中只有樓。如果做人只為層樓，咁同道友有咩分別！
記者:陳家雄
財經評論 舊文
來源 source: http://hk.finance.appledaily.com
