金手指 - 孫柏文 2018年7月24日
金手指：給黎智英一些建議
■黎智英高度讚揚紐約時報嘅網上讀者會員制。 資料圖片
字數有限，議題眾多，即入正題。
上周，孫柏文先話係時候買俄鋁（486），之後埋單升咗唔少。主要都係花旗國財長周末話俄鋁已遞上幾個方案，佢亦想放生俄鋁。不過有如上周話齋，可能到最新限期，又再延期，股價繼續活喺無間地獄。
壹傳媒（282），我以前嘅老闆黎智英，喺佢每周嘅專欄高度讚揚紐約時報嘅網上讀者會員制。引來唔少猜測下一步想點。
首先，佢嘅專欄同黎智英嘅關係，就有如特朗普同twitter戶口。係個徹底繞過高中層，即繞過聖旨解讀層，直接同大眾講心裏話嘅武器。
諗點谷高收入，呢個我好認同。我希望提供多啲意見畀黎主席。首先，網上眾多平台，唯一可養活內容提供者，就係YouTube。我讀緊Digital Journalism碩士，喺班內我都同同學話要將所有內容變短片。有景就拍，如齋寫文，都要自拍讀篇文出來，如果唔係餓死。而做片確實係壹傳媒強項。
不過，我覺最唔妥就係黎智英話：「電子版只是將報紙內容稍作整理上載網上，邊際成本很低。」即電子版繼續受報紙限制去做。問題係紙價貴，歷年每段新聞、專欄字數縮完又縮，又要限死。嗰期想發大講，例如俄鋁被制裁嗰日，都唔得。仲要編死日子出街，你禮拜一，我禮拜二等。壹電子版繼續被報紙嗰十萬份箍死，遲早點擊率都一鑊熟。呢個友網媒HK01係強。
最後，收費會員著數。第一步，我建議兩樣。所有新聞會員睇先，唔畀錢就要等幾個鐘。第二，會員留言置頂幾小時。試嚇先，睇嚇係咪可擺平收入同影響力嘅平衡。
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com
