大棋局：中國借來的繁榮
■《中華人民共和國預算法》規定，除咗發行地方政府債券之外，地方政府及其所屬部門不得以任何方式舉借債務。資料圖片
有條友本來食翠華，信用卡套現100萬後走去食新同樂，埋單留5,000蚊貼士，部長對這位客人肅然起敬。如果佢第二張信用卡可以套現200
萬，找舊數後仍然可以過餐餐食魚翅的生活。
GDP計法係C＋I＋G＋X－M，即係消費＋投資＋政府支出＋出口－入口。過去中國的I係50%，即投資佔中國GDP一半。起高鐵，搞基建，起緊時人人有錢搵，豈是一個爽字了得。但投資完成要埋單計數，入不敷支，點搞？
內地央行同財政部公開互窒，係一個警號。兩大部門嘈一個問題：地方債條數邊個啃？發展要有錢，內地地方政府慣常用兩種方法籌旗。其一，成立一間公司作為融資平台，間公司向銀行借錢，地方政府做擔保，咁銀行就肯借；其二，玩各種協議抵押，例如地方政府將特定服務判畀間公司做，間公司拎份協議去銀行抵押借錢。地方政府債呢條數，係40萬億人民幣。經濟好景時可以借新還舊；經濟唔好景，新項目現金流唔夠還舊數，舊項目又唔賺錢。人大財經委副主任委員賀鏗講得好白，地方政府根本冇一個諗住還。
地方政府唔夠錢周轉
另一方面，由於人民幣過去以外匯為發行基礎。美元萬劍歸宗，中國外匯流失，人民幣發行基礎收縮會造成通縮。於是中國嘗試改變人民幣發行結構，曾想過納入地方債做抵押。但內地民間出現過銀行票據拎出嚟變咗報紙，阿哥，報紙得，咁廁紙都得啦。加上賀鏗所講的大家心中有數，所以用地方債抵押搞唔成。
內地咁多死城，內房企業頭痕緊去庫存，再賣唔出就輪到內房債爆煲問題。於是央行推出一種新做法叫PSL，簡單地講，就係地方政府補貼棚戶（類似寮屋）搞拆遷，拆遷包裝成一個發展項目同銀行借錢，銀行用佢向央行抵押借錢。棚戶有錢買新樓，內房去到貨，地方政府有錢周轉。而最重要嘅，PSL納入人民幣發行基礎。因此搞PSL有兩大結果，一為三、四線城市樓價爆升，二為人民幣含美金量下跌。截至2018年6月，根據央行資產負債表，PSL、逆回購等已佔人民幣發行基礎28.5%。
凡事都有盡頭，預期2020年棚改就差唔多拆完，現正收縮中。咁又返去先前問題，地方政府唔夠錢周轉。結果央行企出嚟話財政部係咪應該做啲嘢？財政部不單反窒，而且揸正嚴查地方政府違規舉債。事關《中華人民共和國預算法》規定，除咗發行地方政府債券之外，地方政府及其所屬部門不得以任何方式舉借債務。以近日舉動看來，財政部話條數佢唔啃。
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.finance.appledaily.com
