【財演算法】一個永遠有效的策略（三）（蔡嘉民）
2018-7-5 9:45:54
上期提到期權引伸波幅(IV)長期都會比起歷史波幅(HV)高，你之前可能會唸，點解莊家開價唔跟實個歷史波幅開呢？個市有幾波動開返幾高嘅權期金咪得囉？因為市場先生永遠是對的，其實係市場入面真係有人肯俾呢
筆錢出黎，所以就會擠高左個波幅率(Volatility)。由於衍生工具市場係零和遊戲，所以有人肯俾錢出黎，你就有權去收取。
其實好多時候，筆者都好鍾意呢一類策略，係一種長期都唔會失效嘅策略，因為背後有超強嘅理論去支持呢種溢價。之前去參加全球最大嘅期貨交易所 — 芝加哥商品交易所(CME)嘅一個年度研討會，佢地都有提及收取期權風險溢價呢一個策略。當中展示左一個十年期嘅回溯測試，證明呢個策略長玩長有。
市場上大分有2類玩家，一類叫做Hedgers，就係投資銀行或者交易商經紀(Inter-dealer broker)入面操盤手做嘅野，有客要買野賣野，大行俾完貨，就要做對沖；另一類就係Speculators，專係做一啲值搏率高嘅投機行動，可能佢地有內幕，或者佢地做左回測。兩者都會做期權長倉去保護倉位或者投機，所以長期都有人做長倉。而對家肯做期權長倉，我地想收取嘅一個波動率風險溢價(Volatility risk premium)，就可以做期權短倉。
可行嘅策略有：純粹單腳短倉，例如Short call/short put，或者一啲Short vega/theta嘅組合，例如Credit spread，又或者兩邊都Short，即係賣出勒束式同馬鞍式組合(Short strangle/short straddle)。當然仲有好多組合變化，任君選擇，只要組合係擁有住負嘅Vega/Theta就可以。全部都可以令你一直咁吸收呢個波動率風險溢價，長遠黎講，回報係會好過你長揸基準指數。因為你有溢價去保護你，就好似收息咁。所以啲人成日話，做個Short put去當收息，不無道理。但要注意嘅係，唔可以盲目開Short put，當中有好多時候，係要平倉/減倉去降低風險。
財演算法 - 蔡嘉民 舊文
來源 source: http://www.winmoney.hk
