地產公用生意最好做
2018年07月05日
人民銀行出口術支持匯價，人仔昨日反彈，但市場疑慮似乎仍未盡除。美國政府提出向總值500億美元中國商品，徵收25%關稅，其中首批340億美元中國商品，將於周五(7月6日)起徵收。中國隨即反擊，同日起向相同價值美國商品，徵收同額關稅。
A股周二反彈後，昨日再度回落，上證指數再創28個月低位。
港股繼續下插，雖然未跌穿假後低位，但內房股回落幅度頗大，似乎內資股逐個板塊受壓現象未消除。
穆迪話樓市六招唔入肉
內房股近日持續受壓，一來係市場擔心人仔有壓力，內地資產有貶值風險，成為沽售內房股理由。上星期陸羽仁提過，話內地對地產商施壓未停，當中包括減慢舊屋棚戶拆遷，迫發展商賣樓，導致內房商資金壓力上升，政策因素成為短期負面消息。
過去內地政府與內房商關係，可以用愛恨交纏形容。內地樓市多年來大漲小回，創造唔少財富，但同時帶來社會問題。政府長期喺樓市維穩不斷出招，壓抑樓價飆升，但每次壓抑到最後，都會衝擊經濟景氣，最後就要鬆綁，樓價乘勢再上。內房商就喺一鬆一緊之間同政府博弈，捱唔過公司就出局，能夠捱過調控的公司就壯大。能夠生存到現在的公司，都係善於適應宏觀氣候的政策鬥士，O依家的不利環境，又係佢哋捱吓日子的調整階段。
同內房商比較，香港地產財團環境就舒服得多，皆因政策對佢哋影響溫和好多。好似特首要交上任一年功課前，滾水淥腳急推房策六招，除咗一招空置稅對發展商賣樓有啲壓力，其餘五招影響都屬於中性甚至有利，特別係抽起九幅地起居屋，一下子減少近萬個私樓單位供應，幾乎等如私樓供應量一半數目。根據政府條數，空置單位數目都冇咁多，O依家抽起咁多私樓地，咁就算徵收空置稅，對地產商都唔慌入肉。評級機構穆迪直言，嗰六招對香港開發商影響溫和及可控，所以呢幾日股市大跌，反而俾政府出招對付的香港地產股，表現就勝過內地行家好多。
另一類逆市而升的股份就係公用股，恒指昨日收報28241點，跌303點；國企指數收報10712點，下滑159點，成交跌到891億元，中電(002) 逆市升近4%，創出近年新高的87.6元；電能(006) 升1.5%，收56.2元，但經營香港業務的港燈信託(2638) 勁升4.4%，報收7.83元，考慮到個市由高位回調近7000點，但佢哋過去一季跑贏大市幅度相當驚人。
大行話監管計劃筍過預期
兩電喺加價效應下股價彈升。有中環茶友心水清，話呢排佢已經見到兩電股價特別硬淨，心諗會唔會係大家覺得貿易戰打到嚟，所以資金避入公用股呢？答案O依家揭咗盅，原來唔止避險因素，仲係兩電有價可加。兩電本來的利潤管制協議調低咗回報率，但因為政府要改善空氣質素，兩電要更換機組，跟住又話要起浮動液化天然氣站，樣樣都可以帶來回報，代價就係加電費，市民畀多啲。
本來大家以為新協議下有電費可減，O依家跌晒眼鏡。第一年電費已經無得減，未來恐怕加價仲會停不了！
茶友話，中電曾經建議起液化天然氣站，但因為投資太大，政府決定叫佢哋幫襯內地買西氣東輸，點知搞咗幾年政府換吓屆，天然氣站計劃又番生，結果又要買西氣東輸，又要起天然氣站，總之搞環保對兩間電力公司就係商機無限。
茶友話，電力公司做好多社會服務，其實都係用戶畀錢，羊毛出自羊身上。總之喺香港做生意，租金貴、人工貴，其實電費都唔平，中小企做埋做埋，租金電費一加，老闆們又要從頭捱過，所以無生意好得過呢兩瓣，造成呢兩大生意的老闆長期高踞超級富豪榜，亦係長期都有得升的股份。政府批准中電和港燈，未來五年資本開支分別增加三成一和四成七，大行摩根士丹利和花旗都指較預期筍，今次春江鴨明顯知道有好嘢，所以股價偷步炒上。
陸羽仁
金融High Tea 舊文
來源 source: http://hdfin.stheadline.com
