笑到最後：假如熊市已來到
■港股今次牛三出現得唔明顯，細價股只係偶有炒作，氣氛遠不及2015年。 資料圖片
假如熊市已然來到，今次可能同以往唔一樣，主要原因嚟自去年牛市的生態，同以前嘅牛市唔同。
一啲所謂牛市嘅特徵，2017年嘅牛市並無展露出嚟，第一樣就係，無雞犬皆升。藍籌升幅過份集
中，冇買騰訊（700）或平保（2318），表現已經要打折扣。一向覺得大牛市升硬嘅港交所（388）同內銀，去到12月先升。以前牛三細價股必炒，今次牛三得唔明顯，二來細價股只係偶有炒作，氣氛遠不及2015年，更遑論2007年以前。
第二樣係，升市途中無明顯調整，強勢股一直保持強勢，原因係港股通北水對任何因素無反應，一路買、買、買。
第三樣係今年、過去大市創新高後調整，不論係再升定轉跌，一般都係3-5個月已知牛定熊，今次創新高後橫行足足5個月。市場另一共識係資訊流動快咗，市場反映得較快，2018年如果牛轉熊，調整期理應比之前快，但今次反而係調整速度減慢。
泡沫點樣開始就會點樣結束，按照以上特徵，第一個推論係：今次冇熊二反彈。其中北水可能主導走勢，以即市表現，北水淨流入變淨流出係近日恒指升轉跌嘅先兆。拉長啲講，一啲以往認為技術反彈嘅位，北水照樣10億至20億元咁淨流出，雖然銀碼並唔算大，但估計會成為大型基金嘅指標，你都沽，不如我沽先，將反彈嘅幅度消磨。
第二個推論係：慢牛轉慢熊。原來資訊發達令市場反應更快，只限於24小時內。每個人只睇手機popup標題當知天下事，對較長嘅趨勢更加無知，形成今年2月至6月炒咗先講嘅橫行局面。
第三個推論係：邊啲升跌邊啲。本欄5月6日文章「港股後市三大可能性」已有論及，故不重覆。
高明
http://fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.finance.appledaily.com
