異動空間 - 魏力 2018年8月27日
異動空間：「眼界大開」業績會 - 魏力
去上市公司業績會，有時真係令人「眼界大開」。
資料圖片
近日去了兩個令小弟「眼界大開」的業績會。第一間市值千幾億，半年賺2億人仔，預測市盈率三位數，近兩個月個市一片死寂，佢就飛升兩倍。咁堅？查番CCASS，得25%股票流通，Top 10證券行揸近9成，明曬。
席間有人問道：本業做養老，擺架電動車入去搞邊科？答案係「大家都有綠色理念」，嗰嚇魏力feel到全場人頭頂都係烏鴉！管理層可謂準備充足，唔係對好曬稿，相信腦筋曉飄移都諗唔到。另一問題更妙：公司盈利點解可以大幅增長，有何競爭優勢？第一次聽到咁善良的Q，完全係畀位一眾高管盡情發揮，將手上份稿流暢地唸一次。之後另一記者提問，問甚麼忘記了，重點是高管都未答完，阿妹就拎袋走人，齋問唔使記答案，莫非一切已在心中？
另一間同系公司業績會，市值200億，半年做兩億幾生意，淨賺1億，純利率40幾巴仙，做邊瓣咁堅？公司話係做互聯網「社區服務、家居、材料物流」，範圍闊成咁，好有潛力咁喎！魏力上網搵嚇佢網頁，只找到一間同名的連鎖服裝店，連介紹公司的網頁都欠奉。三條「問題」之後，MC忽然宣佈業績會結束，高管極速離場，一定係好忙喇！
魏力
http://fb.com/2012jason
本欄逢周一、五刊出
異動空間 - 魏力 舊文
來源 source: http://hk.finance.appledaily.com
