智取大市：生科龍頭靠後台 - 晉佳
藥明生物有江澤民孫江志成（左）、馬雲（右）等人持股，後台夠硬，更易獲得優質項目。
承接之前講生物科技股，藥明生物（2269）有江澤民孫江志成、馬雲等人持股，以中國國情睇，有後台就更易獲得優質項目，估計生物科技行業會被一眾有後台嘅企業寡頭壟斷。藥明會成
為其中一間龍頭，近千億市值合理。
今年3月，藥明合作夥伴中裕嘅愛滋病藥獲得美國FDA批准上市，由藥明代工生產，成為公司首個商業化生產項目，令股價一個月急升五成。市盈率過百倍，但集團跟全球20大藥廠當中的13間合作，最新業績顯示其臨床3期項目由1年前6個，增加到10個，研發能力理想，成為股價績後急彈主因。以平均兩成半至三成臨床3期項目能通過試驗計，加上當局批准，預計可見將來有2至3隻新藥上市。
另外，藥明78隻進入臨床1至2期項目中，估計再有4至5隻新藥數年內推出。以上係以平均數字去估，長遠風險係通過試驗比例低過預期，但點都好，新藥獲批數目增加係遲早嘅事，藥明盈利高速增長可測性高。
業績後股價大彈，最令人卻步係高位股東沽舊股套現，加上圖表呈大型頭肩頂屬利淡。反正股價已彈，想長揸不妨逢低吸，始終長遠前景值得期待。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
